Директорот на ЈП Железници Инфраструктура, Синиша Ивановски, објави видео и фотографии од акцијата за чистење и уредување на Железничката станица во Скопје, оценувајќи дека објектот со години бил оставен во запуштена состојба.
„Железничката станица во Скопје треба да претставува гордост на главниот град“, напиша Ивановски на својот фејсбук профил.
Според него, децениската негрижа довела станицата да стане „тотално нерепрезентативен објект“, преполн со билборди, графити, стари постери и несоодветни содржини.
Во рамки на акцијата, како што информира, веќе се отстранети сите билборди и светлосни реклами, освен една реклама на „Хамза Донер“, за која рече дека доколку не биде отстранета во рок од седум дена, договорот за закуп ќе биде раскинат.
„Се отстранија и сите информативни постери кои со години се напластени, а продолжуваме со генералната хигиена“, наведе Ивановски.
Тој најави и подолгорочен процес за целосно обновување на објектот.
„Во моментов заедно со Архитектонскиот факултет работиме кон проектирање на целосна реконструкција на железничката станица, а со ИЗИИС ја проверуваме конструкцијата на самата станица“, објави директорот на ЈП Железници Инфраструктура.
Според него, враќањето на нормалниот изглед на Железничката станица нема да биде лесен процес, но порача дека „треба да се почне денес“.
Во објавата тој упати благодарност и до полициската станица на МВР која се наоѓа во склоп на објектот, за, како што наведе, секојдневната соработка и помош.
