По хакерскиот напад врз „Бајнанс“, корисниците повлекоа криптовалути вредни 3,64 милијарди долари

По кибернападот во кој беа украдени криптосредства во вредност од 6,3 милијарди долари, корисниците на најголемата светска криптоберза „Бајнанс“ повлекле вкупно 3,64 милијарди долари. Повлекувањата следувале откако платформата повторно започнала со работа, а од компанијата велат дека првичниот бран на одлив на средства веќе се стабилизирал.

— реклама —

„Бајнанс“ соопшти дека заклучно со 28 октомври управувала со средства во вредност од 171 милијарда долари и имала 335 милиони регистрирани корисници низ светот.

— реклама —

По нападот, компанијата објави дека успеала да обезбеди замена за 95 отсто од украдените средства, користејќи сопствени пари за набавка на соодветни токени. Преостанатите пет проценти се помалку ликвидни средства, за кои процесот на обезбедување може да потрае подолго. Повлекувањето на криптосредствата се одвива постепено.

Нападот предизвика дополнителна загриженост за безбедноста на криптопазарот и се одрази врз движењето на водечките криптовалути. Биткоинот во петокот падна на најниското ниво во последните шест недели, по што делумно закрепна и денеска се тргуваше над 78.000 долари. Етериумот, пак, забележа мало зголемување на вредноста по падот на 2.287 долари, најниско ниво во последните два месеци.

— реклама —

Американското Федерално биро за истраги (ФБИ) соопшти дека зад нападот стои хакерска група поврзана со Северна Кореја, позната под името „ТрејдерТрејтор“.

— реклама —

Според податоците на американската компанија за анализа на блокчејн „ТРМ Лабс“, кражбите на криптовалути остануваат сериозен проблем. Минатата година, во речиси 150 одделни напади, биле украдени криптосредства во вкупна вредност од околу 2,9 милијарди долари.