По недостигот од 80 милиони денари од Државна лотарија, Климовски најави проверки за 2023 и 2022 година

Прашањето за недостигот од 80 милиони денари од сметката на Државна лотарија беше упатено до директорот Александар Климовски, кој објасни дека случајот бил утврден при ревизијата за 2024 година, а во следниот период ќе се проверува и работењето во претходните години.

— реклама —

На прашањето кога последен пат била спроведена независна ревизија на дневните уплати, прометот и целокупното работење, Климовски одговори дека Државниот завод за ревизија го утврдил случајот при проверката за 2024 година. Тој најави дека ќе следуваат проверки и за 2023 година, а можно е да се испита и работењето во 2022 година за да се утврди дали недостигаат средства и за тие периоди.

— реклама —

Климовски посочи дека веднаш по преземањето на функцијата генерален директор се обратил до Државниот завод за ревизија, имајќи ја предвид обемноста на материјалот поврзан со работењето на институцијата.

— реклама —

Тој додаде дека уште пред објавувањето на конечниот ревизорски извештај добил индикации за можни неправилности и одлив на пари, по што била алармирана Финансиската полиција.

„Случајот е утврден од страна на Државниот завод за ревизија кога дојде за 2024 година. Сега ќе следи истрага за 2023 година, да видиме колку пари фалат и за 2023 година. Може и за 2022 да видиме колку фалат“, изјави Климовски.