Жителите на областите северозападно од Атина погодени од големите шумски пожари почнаа да се враќаат во своите оштетени домови, откако огнената стихија беше ставена под контрола. И покрај тоа, стотици пожарникари остануваат на терен поради опасност од повторно активирање на пожарите во тешко достапните ридски предели.
Во гаснењето и натаму учествуваат воздушни сили, а на грчките екипи им помагаат пожарникари од Романија и Франција, кои се распоредени на неколку локации западно од Атина, во областа околу Коринтскиот Залив.
Силниот ветер што дува од Егејското Море и понатаму ја отежнува работата на пожарникарите, а според заменик-портпаролот на противпожарната служба, Јоанис Артопојос, во еден период од 30 часа не можеле да користат противпожарни авиони, што значително ја усложнило борбата со огнот.
Европа ова лето се соочува со сериозни шумски пожари, поттикнати од рекордно високите температури и недостигот од врнежи, а научниците предупредуваат дека климатските промени дополнително ги влошуваат ваквите екстремни појави. Франција и Шпанија исто така беа погодени од големи пожари, но тие беа локализирани во текот на викендот.
Во Грција, двајца членови на екипажот на противпожарен хеликоптер загинаа во неделата по судир со друг хеликоптер во близина на крајбрежниот град Псата. Несреќата е предмет на истрага.
Грчката влада најави обештетување за граѓаните чии домови се уништени или оштетени во пожарите.
„Беше прекрасно место, тука ги поминувавме летата, а сега не остана ништо“, изјави една жителка, обвинувајќи ги службите за бавна реакција.
Друг жител рече дека иако неговиот дом бил спасен, чувството на загуба е огромно.
„Нашата душа гори. Гледајќи го уништениот пејзаж, чувствуваме дека нè оставија сами да се справуваме со огнот“, изјави тој за „Ројтерс“.
