Иако следната седмица во делови од Европа се очекува краткотрајно намалување на температурите, метеоролозите предупредуваат дека веќе од почетокот на јули континентот би можел повторно да се соочи со екстремни горештини.
Француските метеоролошки служби прогнозираат голема веројатност за нови продори на жежок воздух од Сахара, особено во периодот од 10 до 14 јули. На ова предупреди и француската министерка за еколошка транзиција, Моник Барбо, повикувајќи се на податоци од националната метеоролошка служба.
Според прогнозите, по актуелниот топлотен бран ќе следи краток период на освежување, но температурите и понатаму ќе останат над просекот за овој дел од годината.
Метеорологот Режи Крепе од „Ла Шен Метео“ изјави дека веќе подолг период се очекувало летото 2026 година да биде исклучително топло.
„Сосема е можно повторно да имаме продори на жежок воздух од Сахара кон Франција и западна Европа, при што нов врв на топлотниот бран би можел да се случи околу 14 јули“ – посочи Крепе.
Според метеоролошките модели, можно е формирање на студен атмосферски систем покрај брегот на Пиринејскиот Полуостров, додека над западна Европа повторно би се воспоставил антициклон. Ваквата состојба би можела да создаде таканаречен „топлотен капак“, кој ќе го задржува жешкиот воздух над континентот.
Експертите предупредуваат дека комбинацијата од високи температури и суша дополнително го зголемува ризикот од нови и поинтензивни топлотни бранови.
И покрај можноста август да донесе повеќе нестабилно време и локални врнежи, метеоролозите засега не можат со сигурност да предвидат дали тоа ќе биде доволно за значително намалување на температурите.
Според проценките, температурите ова лето би можеле да бидат за 0,5 до 1,5 Целзиусови степени над повеќегодишниот просек, додека локално се очекуваат и поинтензивни невремиња.
Метеоролозите потсетуваат дека временските услови можат брзо да се менуваат, но предупредуваат дека зачестените топлотни бранови стануваат сè поизразена реалност во Европа.
