Нестле потврди дека е активирана онлајн алатка за проверка на сериски броеви на чоколадите „КитКат“, откако биле украдени повеќе од 12 тони од овој производ наменет за европскиот пазар.
Преку посебниот систем, потрошувачите можат да проверат дали производот што го купиле е дел од украдената пратка, така што треба да го внесат бројот на серијата од пакувањето. По внесувањето, алатката покажува дали чоколадицата припаѓа на исчезнатата пратка.
Доколку има совпаѓање, корисниците добиваат дополнителни насоки како да го известат производителот.
Од компанијата посочуваат дека кражбата на товар станува сѐ поголем проблем за работењето, без оглед на големината на компаниите. Нестле соопшти и дека, доколку преку системот се идентификува украден производ, ќе постапува согласно насоките на надлежните органи.
Компанијата и претходно уверуваше дека безбедноста на потрошувачите не е доведена во прашање и дека снабдувањето на пазарот не е нарушено.
Според наводите, минатата недела бил украден камион со околу 12 тони чоколади, односно приближно 410.000 чоколадици, кој од централна Италија требало да стигне во Полска, но никогаш не пристигнал на дестинацијата. Возилото и стоката досега не се пронајдени, а истрагата е во тек.
