Општина Ѓорче Петров е првата општина која започна подготовки за зимската сезона. Градоначалникот Александар Стојкоски објави дека екипите веќе преземаат активности за да делуваат на критичните точки.
„Очекуваме влошување на временските услови и пад на температурите од понеделник. Екипата од комуналниот пункт на Општина Ѓорче Петров е спремна за предизвикот да делува на критичните точки“, напиша Стојкоски.
Во следните денови ќе преовладува променливо облачно време со повремени врнежи од дожд кои на места ќе бидат пообилни и поројни. На повисоките планини врнежите ќе бидат од снег. За време на викендов ќе дува умерен до засилен ветер од јужен правец (над 60 км/час), што ќе услови повисоки температури. Во вторник под влијание на студен бран ќе дува засилен северен ветер, ќе има значително намалување на температурите и повремен снег и на повисоките места. Не се исклучува снег и на пониските места.
