Екоактивистите од иницијативата „Здрава котлина“ повторно излегоа со остра реакција и порачаа дека нема да дозволат отворање рудник на планината Огражден над селата Иловица и Штука, откако Владата соопшти дека Вишиот управен суд ја поништил одлуката со која претходно беше укинато спојувањето на двете концесии за експлоатација на минерални суровини.
Владата информираше дека станува збор за конечна судска одлука што институциите се должни да ја почитуваат, нагласувајќи дека случајот е наследен од претходните одлуки донесени во 2023 година. Тогаш, во јуни беше донесена одлука за спојување на двете концесии, а само еден месец подоцна таа одлука беше поништена, по што концесионерот „Еуромакс“ поднесе жалба.
Од Владата посочија дека сите идни постапки ќе се спроведуваат врз основа на законските процедури, стручните анализи и институционалниот надзор, при што ќе се води сметка за заштита на животната средина и здравјето на граѓаните.
„Секое понатамошно постапување ќе се одвива исклучиво врз основа на стручни анализи, законски процедури и институционален надзор, со целосна информираност на јавноста“, наведуваат од Владата.
Екоактивистите од граѓанската иницијатива „Здрава котлина“ остро реагираа на одлуката, оценувајќи дека пресудата на Вишиот управен суд е донесена со „штуро образложение“ и изразија незадоволство што Владата не вложила приговор.
„Владата се прави како да не прочитала во одлуката дека треба повторно да решава и за неа ова било конечно решение. Не се бунела да вложи приговор, чекала да помине рокот и сега да се почитувале законите. Нема да копате, а отворивте војна со народот“, наведуваат екоактивистите во објава на социјалните мрежи.
Тие повторно ги потенцираа своите забелешки за проектот, меѓу кои се, како што тврдат, несоодветноста на студиите, користењето на водите од Турија, како и можните еколошки последици од работењето на рудникот.
Потсетуваат дека и во јули 2023 година во Струмица се одржаа протести против спојувањето на концесиите за рудникот Иловица-Штука, кога граѓаните и еколошките здруженија јавно се спротивставија на проектот.
