По пет години пауза, од 1 април повторно директни летови Скопје – Дубаи, повратен билет по цена од 580 евра

Македонските патници од 1 април 2027 година повторно ќе можат да патуваат директно од Скопје до Дубаи, откако авиокомпанијата „Флајдубаи“ го потврди враќањето на авиолинијата. Предвидени се три лета неделно, а почетната цена на повратен билет во економска класа изнесува 580 евра.

Според објавениот распоред, авионите ќе сообраќаат секој понеделник, четврток и сабота. Полетувањата од Скопје ќе бидат во 14:30 часот, со пристигнување во Дубаи во 21:45 часот по локално време. Летовите од Дубаи ќе тргнуваат во 9:55 часот, а во Скопје ќе пристигнуваат во 13:30 часот.

— реклама —

Најниската цена за повратен билет во економската тарифа Lite започнува од 580 евра, додека билетите во бизнис-класа се достапни од 3.000 евра. Цените зависат од достапноста и условите за резервација, а билетите веќе се во продажба преку официјалните канали на авиокомпанијата.

— реклама —

Враќањето на линијата отвора и можности за поврзување со повеќе далечни дестинации. Благодарение на партнерството со „Емирати“, патниците од Скопје ќе можат да продолжат кон Австралија, Шангај, Сингаур, Бангкок, Коломбо и Занзибар. Поврзаните летови овозможуваат резервација во рамките на едно патување и префрлање на багажот до крајната дестинација, согласно со условите на билетот.

Од „Флајдубаи“ очекуваат линијата да привлече патници од македонската дијаспора во Австралија и Азија, но и деловни патници и туристи. Истовремено, директната врска може да придонесе за зголемување на бројот на посетители од Обединетите Арапски Емирати, кои ќе имаат полесен пристап до туристичките места во Македонија, меѓу кои Охридското Езеро, Шар Планина и културно-историските знаменитости на Скопје.

— реклама —

„Флајдубаи“ првпат воспостави директни летови меѓу Скопје и Дубаи во октомври 2012 година, а со најавеното враќање повторно ќе биде присутна на македонскиот пазар.

— реклама —

Обновувањето на авиолинијата доаѓа во период на раст на авиосообраќајот во земјава. Според податоците на ТАВ Македонија, двата македонски аеродрома во 2025 година опслужиле 3,48 милиони патници, што е зголемување од девет проценти во споредба со претходната година.

Колкав ќе биде придонесот на новата линија за туризмот и деловните врски ќе покаже побарувачката, како и одржливоста на редовните летови.