Политичката сцена во Унгарија претрпе драматични промени по изборната победа на Петер Маѓар и неговата партија Тиса, која освои двотретинско мнозинство во парламентот. Според анализа на Euronews, изборниот пораз на Виктор Орбан означил почеток на брзо демонтирање на политичкиот и институционалниот систем што го градеше во изминатите 16 години.
Се наведува дека Орбан телефонски му ја честитал победата на својот политички противник, по што започнал процесот на промени во државните институции. Новото парламентарно мнозинство му овозможило на Маѓар да иницира измени на Уставот и да спроведе реформи без поголеми пречки.
Меѓу првите потези на новата власт биле барањата за оставки на високи државни функционери. Во наредните месеци функциите ги напуштиле претседателот Тамаш Шуљок, главниот јавен обвинител и повеќе раководители на безбедносните служби, а бил укинат и Уредот за заштита на суверенитетот, кој претходно беше критикуван од Европската комисија.
Новата влада започнала и опсежни истраги за корупција поврзани со периодот на владеење на Фидес. Парламентот формирал посебен Уред за заштита и враќање на имотот, чија задача е да ги испита наводите за злоупотреба на јавни средства и незаконски стекнат имот. Под лупа се нашле и бизнисмени кои важеле за блиски до Орбан.
Во тек се и истраги за повеќе случаи, меѓу кои и наводната злоупотреба на средства од Националниот фонд за култура, како и случајот поврзан со работењето на Унгарската народна банка.
Истовремено, парламентот усвоил закон со кој премиерскиот мандат се ограничува на осум години, а се воведуваат ограничувања и за должината на мандатите на пратениците. Поради ретроактивната примена на законот, Орбан повеќе нема можност повторно да се кандидира за премиер.
Значителни промени се случиле и во медиумскиот сектор. Државната телевизија претрпела раководни промени и најавила реорганизација, додека дел од медиумите блиски до поранешната власт останале без државно финансирање, што довело до отпуштања и затворање на одредени проекти.
Од Фидес остро ги критикуваат потезите на новата власт, оценувајќи дека станува збор за напад врз демократијата и политички реваншизам. Од друга страна, Маѓар тврди дека реформите имаат цел да ја обноват независноста на институциите, да воспостават владеење на правото и да стават крај на политичкото влијание врз државниот систем.
Според анализата на Euronews, вистинскиот тест за новата власт ќе биде подготовката на нов Устав и начинот на кој ќе се спроведат најавените демократски реформи.
