По повеќе од 25 години пауза, МЗТ Скопје повторно ќе биде дел од европската кошаркарска сцена. Клубот во вторник, 6 октомври, од 19 часот во спортскиот центар „Јане Сандански“ ќе го пречека грчкиот Ираклис.
За навивачите е подготвена програма која ќе започне неколку часа пред натпреварот. Од 17 часот пред спортскиот центар ќе има музика со DJ Alen, храна, пиво и други пијалаци, а најмладите посетители ќе можат да се забавуваат со цртање лица во боите на клубот.
Дел од програмата ќе биде и ADMIRAL FREE SHOOT CHALLENGE – натпревар во слободни фрлања со богат награден фонд, во кој учесниците ќе имаат можност да освојат iPhone, спортска опрема, маички и други награди.
Од клубот очекуваат програмата пред спортскиот центар да ги обедини навивачите, семејствата и љубителите на кошарката, по што прославата на европското враќање ќе продолжи на трибините со поддршка за МЗТ Скопје во дуелот со Ираклис.
