Ексдиректорот на Лотарија не се гледа за виновен: Набавените средства и денес се сопственост на „Државна лотарија“, нивната вредност е зголемена

Перпарим Бајрами, поранешниот директор на „Државна лотарија“, денеска првпат се изјасни пред судот во предметот „Лотарија“ и рече дека не се чувствува виновен за делата што му се ставаат на товар. Вина не призна ниту обвинетиот Башким Авдиу.

Адвокатот на Бајрами, Еленко Миланов, на почетокот на главната расправа најави дека одбраната ќе ја дополни листата на докази, откако неговиот клиент извршил увид во предметот на 16 септември, два дена пред денешното рочиште.

„Обвинетиот Перпарим Бајрами увид направи на 16 септември оваа година, односно два дена пред почетокот на оваа главна расправа. По кратка консултација со мојот клиент произлезе потреба од обезбедување докази на одбраната кои не се содржани во листата на докази на Обвинителството, а се од значење за постапката“, рече Миланов.

— реклама —

Меѓу доказите што одбраната најави дека ќе ги предложи е завршната пресметка на „Државна лотарија“ за 2024 година, особено во делот на евидентирањето и вредноста на материјалните средства набавени преку јавната набавка која е дел од обвинението.

Одбраната бара и договор склучен со Бајрами како претседател на Управниот одбор и директор на „Државна лотарија“, како и документација од Надзорниот одбор и евентуалното одобрение од Собранието на акционери врз основа на кое бил склучен договорот.

Миланов најави и наод и мислење од технички советник на одбраната за набавените средства, нивната моментална состојба и договорите склучени за нивно користење.

— реклама —

Одбраната тврди дека средствата и денес се во сопственост на „Државна лотарија“ и дека нивната вредност во моментов е значително повисока отколку во времето кога биле набавени.

Според тезата што ја изложи Миланов пред судот, овие материјални средства претставуваат зголемување на имотот на акционерското друштво. Со најавените докази одбраната ќе се обиде да ги оспори наводите од обвинението за штетата предизвикана на „Државна лотарија“.

— реклама —

Меѓу најавените докази се и записници од Државниот пазарен инспекторат и Управата за јавни приходи поврзани со барањата за исполнување на техничко-технолошките услови за деловните простории во кои биле поставувани апаратите што се предмет на постапката.

Миланов побара и документација од Министерството за финансии поврзана со правото на самостојно приредување игри на среќа.

Одбраната најави и дополнителни сведоци. Адвокатот Гоце Ристевски рече дека во барањата на одбраната има наведено сведоци и институции од кои треба да се обезбедат докази.

„Ако не успееме да ги обезбедиме, ќе побараме помош од судот“, рече Ристевски.

Артан Груби ќе се произнесе за начинот на кој се разгледувале и носеле одлуките на владините седници.

Обвинителството во предметот тврди дека во текот на 2023 и 2024 година обвинетите ги пречекориле службените овластувања и со тоа била предизвикана штета на „Државна лотарија“ од 596.125.511 денари. Одбраната, пак, со најавените докази ќе настојува да ги оспори овие тврдења.