По Србија и Македонија, нови проблеми за „Алта“ и во Црна Гора – одземена дозвола за платежни услуги

Советот на Централната банка на Црна Гора денеска донесе одлука за одземање на одобрението за давање платежни услуги на „Алта пеј груп“ ДОО Подгорица, откако утврдил дека компанијата повеќе не ги исполнува законски пропишаните услови за вршење на оваа дејност.

Одлуката доаѓа во период на сериозни случувања поврзани со името „Алта“ во регионот. Во Србија беше одземена дозволата за работа на Алта банка АД Белград, додека Народната банка на Македонија воведе привремена администрација во Алта банка АД Битола, со ограничувања на одливот на средства од сметките на клиентите.

— реклама —

Според соопштението на црногорскиот регулатор, одземањето на одобрението на „Алта пеј груп“ следува по сеопфатна процена на исполнувањето на регулаторните барања.

Во постапката биле разгледувани и соодветноста на сопственикот со квалификувано учество, како и условите за стабилно, сигурно и законито работење на платежната институција.

— реклама —

Од Централната банка на Црна Гора посебно нагласуваат дека „Алта пеј груп“ не е банка и не прима депозити од граѓани и компании. Оттаму уверуваат дека одлуката нема да ја загрози финансиската стабилност на земјата, ниту редовното функционирање на платниот систем.

— реклама —

Регулаторот соопшти дека навремено презел мерки за уредно исполнување на обврските на компанијата и заштита на интересите на нејзините корисници.

Граѓаните и компаниите во Црна Гора, според Централната банка, можат непречено да ги користат платежните услуги на банките и другите овластени даватели.

— реклама —

Одземањето на одобрението на „Алта пеј груп“ е посебна регулаторна постапка и не значи дека станува збор за банка на која ѝ е одземена банкарска дозвола.

Во Македонија, пак, Народната банка претходно нагласи дека Алта банка АД Битола е ликвидна, високо капитализирана и ги исполнува супервизорските стандарди, а привремената администрација е воведена поради случувањата со нејзиниот акционер во Белград.