По вооружените напади во Атина, министерот призна пропуст во обезбедувањето

Грчкиот министер за заштита на граѓаните Михалис Хрисохоидис изјави дека постоел безбедносен пропуст во судските објекти во Атина каде што вчера се случија вооружени напади, но нагласи дека Грција останува мирна и безбедна земја.

— реклама —

Во интервју за телевизијата „Action 24“, тој посочи дека во објектите не постоеле рендгенски уреди и доволен персонал за контрола при влез, што, како што рече, претставува слабост во системот на обезбедување.

— реклама —

Хрисохоидис оцени дека е потребна подобра организација на безбедносните процедури, но отфрли заклучоци дека инцидентите ја менуваат општата безбедносна состојба во земјата. Според него, станува збор за изолиран случај со опасен поединец, а не за поширок безбедносен проблем.

— реклама —

Во вооружените напади беа полесно повредени пет лица, а сторителот, 89-годишен маж, беше уапсен во градот Патра. Тој, според информациите, со ловечка пушка влегол во објект на Националниот фонд за социјално осигурување и во Апелацискиот суд во Атина, по што бил лоциран и приведен во близина на пристаништето.

— реклама —

Министерот додаде дека полицијата брзо реагирала за да се спречи натамошна опасност и дека ќе следува анализа за унапредување на безбедносните мерки во слични институции.