Премиерот Христијан Мицкоски изјави дека Владата побарала од УНЕСКО шестгодишен период за да ги исправи долгогодишните проблеми поради кои Охридскиот Регион повторно е предложен за впишување на Листата на светско наследство во опасност.
Тој рече дека актуелната состојба е резултат на проблеми наследени со децении и дека за две години не може да се поправи она што, според него, било уништувано повеќе од три децении.
„Тоа е наследен проблем од порано. Ние, како ниту една влада претходно, презедовме активности. Тука беа луѓето од УНЕСКО пред некоја недела. Ги посетија сите општини, разговараа со сите релевантни чинители, вклучително и со мене во Владата“, изјави Мицкоски.
Тој посочи дека Владата побарала дополнително време за спроведување на неопходните мерки.
„Ние бараме одреден период, шест години бараме период во кој тоа што било констатирано од минатото да го исправиме. Не можеме, едноставно, и супермени да бевме, за две години да исправиме нешто што е три и пол децении расипувано. А во овој случај, богами и малку повеќе“, рече премиерот, осврнувајќи се на дивоградбите и интервенциите долж охридското крајбрежје.
Според него, Владата ги презентирала своите аргументи пред УНЕСКО, а конечната одлука сега е во рацете на организацијата.
„Ние побаравме, ги аргументиравме нашите позиции, ги претставивме нашите аргументи. Останува УНЕСКО да одлучува. Тука сме повеќе немоќни што да направиме“, изјави Мицкоски.
Тој нагласи дека процесот не зависи само од Македонија, туку и од Албанија, бидејќи Охридското Езеро е заедничко природно наследство.
„Не зависи само од нас, туку и од нашиот сосед, бидејќи Охридското Езеро ни е споделено. Ние сме подготвени да формираме мешовита комисија, каква што се бара, и ќе бидеме проактивни. Не знам зошто тоа не било направено изминативе децении, но ние ќе го направиме“, рече премиерот.
Мицкоски додаде дека Владата ќе продолжи со активностите, но конечната одлука дали Охридскиот Регион ќе биде ставен на Листата на светско наследство во опасност ќе ја донесе УНЕСКО.
