Почина Димитар Георгиев – Шеки, еден од најголемите струмички фудбалски таленти!

Струмица се простува од Димитар Георгиев – Шеки, едно од најголемите фудбалски имиња во градот и играч кој со својот исклучителен талент, атрактивните потези и прекрасните голови остави неизбришлива трага во историјата на Беласица и Тиверија.

Шеки зад себе остави кариера долга повеќе од две децении, исполнета со незаборавни настапи, голови и моменти што со години ќе ги паметат љубителите на фудбалот.

— реклама —

Во дресот на Беласица настапувал во десет сезони, одиграл 236 лигашки натпревари и постигнал 50 голови, со што се вбројува меѓу десетте најуспешни фудбалери во клупската историја според бројот на настапи и постигнати погодоци.

Дебитирал за Беласица во ноември 1971 година, на натпреварот против Балкан од Скопје. Неговиот талент веднаш дошол до израз, па за неговите квалитети се заинтересирале и други клубови, меѓу кои Пелистер и Куманово. Сепак, продолжил да го носи дресот на струмичкиот клуб, а во сезоната 1973/74 со 13 постигнати голови бил најдобар стрелец на тимот.

Во летото 1974 година се преселил во Тетекс, кој тогаш настапувал во Втората југословенска лига. Таму поминал две сезони, настапувајќи заедно со Благој Георгиев и Васил Рингов, по што во 1976 година се вратил во Беласица.

— реклама —

По настапите во ЈНА во сезоната 1977/78, повторно продолжил со добри игри во струмичкиот клуб. Во сезоната 1978/79 постигнал седум голови и бил трет стрелец на тимот, кој го освоил третото место. Во следните сезони продолжил да биде важен дел од екипата, со краток престој во Пролетер од Стојаково.

Особено блескава била сезоната 1982/83. Шеки бил најдобар стрелец на Беласица со девет голови, а тимот ја освоил шампионската титула во Првата македонска лига. Тоа било едно од најзначајните поглавја во неговата богата фудбалска кариера.

— реклама —

Во следните две сезони настапувал за Беласица во Втората југословенска лига – Исток, а во сезоната 1983/84 со шест голови бил трет стрелец на тимот.

Во летото 1985 година преминал во Тиверија, каде што во следните четири сезони одиграл 91 натпревар и постигнал 25 голови. Неговите настапи биле одбележани со квалитет, искуство и препознатлива фудбалска техника. Во сезоната 1988/89, кога Тиверија настапувала во Првата македонска лига и го освоила петтото место, Шеки бил прогласен за најдобра лева полутка во лигата.

Потоа настапувал за Вардарски од Богданци, а во пролетта 1990 година повторно се вратил во Беласица, за која одиграл уште четири натпревари во Третата југословенска лига – Исток. Последниот настап за Беласица го имал во април 1990 година, против Тетекс.

Неговата фудбалска приказна продолжила и во следните години. Во сезоната 1992/93 бил најдобар играч и стрелец на Тиверија во Третата македонска лига – Исток, помагајќи му на клубот да се пласира во Втората лига – Исток. Последната полусезона во кариерата ја одиграл во есента 1993 година, кога настапил на пет натпревари. Последниот меч го одиграл против Брегалница од Штип.

Неговото име ќе остане запишано во спортската историја на Струмица, а спомените за неговите мајсторски потези и голови ќе продолжат да живеат меѓу генерациите фудбалски љубители.