Почина Џон Д. Рокфелер IV, поранешен гувернер и долгогодишен американски сенатор

На 89-годишна возраст почина Џон Д. Рокфелер IV, поранешен гувернер на Западна Вирџинија и петкратен сенатор на Соединетите Американски Држави. Тој починал во петокот во својот дом во Вашингтон, а веста за смртта ја потврдило неговото семејство преку претставничката Шели Роџерс.

Рокфелер, правнук и имењак на основачот на нафтената компанија „Стандард Оил“, во средината на 1960-тите, наместо да го следи привилегираниот живот на своето семејство, одлучил како социјален работник да живее меѓу рударите за јаглен во Апалачките Планини.

— реклама —

Подоцна ја започнал политичката кариера и од 1977 до 1985 година бил гувернер на Западна Вирџинија. Потоа поминал три децении во американскиот Сенат, каде што изградил претежно либерален политички профил, но истовремено се залагал и за националната безбедност и правата на воените ветерани.

Во текот на политичката кариера лесно ги добивал изборите, а во Сенатот поддржувал даночни реформи и законски решенија за заштита на животната средина, меѓу кои и контрола на површинското ископување јаглен. Овој начин на рударење остава сериозни оштетувања на земјиштето и предизвикува ерозија, но се применува како алтернатива на скапото и опасно подземно ископување.

— реклама —

Поради неговото политичко влијание, во минатото се појавуваа и шпекулации дека еден ден би можел да се кандидира за претседател на САД, но Рокфелер не брзаше со таков чекор.

— реклама —

По атентатот врз сенаторот Роберт Ф. Кенеди во 1968 година, тогашниот гувернер на Њујорк, Нелсон Рокфелер, имал овластување да го назначи неговиот наследник во Сенатот. Меѓу можните кандидати го разгледувал и својот внук, Џон Д. Рокфелер IV.

„Добив повик од чичко ми Нелсон, кој ми го понуди местото на Боби Кенеди во Сенатот, но веднаш го одбив“, се присетил Рокфелер во интервју за „Њујорк тајмс“ во 1991 година.

— реклама —

Наместо сенаторската функција, тој добил четиригодишен, главно церемонијален мандат како државен секретар на Западна Вирџинија. Тоа подоцна му послужило како почетна точка за кандидатурата за гувернер на оваа американска сојузна држава во 1972 година.