Две години по пукањето на предизборниот митинг на Доналд Трамп во Пенсилванија, почина Џејмс Копенхавер, еден од луѓето кои беа ранети во нападот.
Копенхавер беше погоден на 13 јули 2024 година, кога 20-годишниот Томас Метју Крукс отвори оган од блискиот покрив за време на митингот во комплексот „Батлер Фарм Шоу“. Во нападот беше погоден и тогашниот претседателски кандидат Трамп, кој се здоби со повреда на увото.
Копенхавер, кој тогаш имал 74 години, се наоѓал на трибините, лево од Трамп. Тој се здобил со две прострелни рани, при што еден куршум останал во неговото тело. По нападот бил пренесен во Општата болница Алегени, каде што поминал околу две недели.
Подоцна тој раскажувал дека едниот куршум му го пробил трицепсот, додека другиот останал во телото и предизвикал оштетување на нервите. Поради повредите морал да користи и стап за одење.
Копенхавер починал во болница во средата, опкружен со членовите на семејството. Неговиот адвокат Џозеф Фелдман го опиша како ветеран и посветен сопруг, татко и дедо.
Официјалната причина за смртта не е соопштена, но лице блиско до семејството навело дека Копенхавер починал од компликации поврзани со повредите и куршумите кои останале во неговото тело.
Претходно оваа година, Копенхавер поднел тужба против американската влада, во која ја обвини Тајната служба за „небрежност“ и „невнимание“ за време на нападот. Во тужбата се наведува дека поради повредите морал да се подложи на повеќе хируршки интервенции.
Во истиот напад загина Кори Компереторе, додека Дејвид Дач исто така беше ранет.
Трамп по смртта на Копенхавер му оддаде почит преку социјалните мрежи, нарекувајќи го „вистински американски патриот“ и истакнувајќи ја неговата храброст по нападот.
Напаѓачот Томас Метју Крукс беше ликвидиран на местото од припадници на Тајната служба.
