Почина Томче Филиповски, легендарниот фудбалер на Работнички

На 84-годишна возраст почина Томче Филиповски, едно од најзначајните имиња во историјата на македонскиот фудбал и легенда на скопски Работнички.

Филиповски цели 18 години го носеше дресот на Работнички, со кој остави длабока трага во историјата на клубот од Дебар Маало. За скопскиот тим одигра 633 натпревари и постигна 225 голови, а во сезоната 1971/72 беше најдобар стрелец во Втората југословенска лига.

— реклама —

И покрај бројните понуди да ја продолжи кариерата во друг клуб, меѓу кои и од Вардар, Филиповски остана верен на Работнички до крајот на својата играчка кариера.

По завршувањето на кариерата како фудбалер, продолжи активно да придонесува за развојот на фудбалот како спортски работник и функционер. Од 1987 до 1991 година беше претседател на Фудбалскиот сојуз на Југославија.

— реклама —

Во тој период југословенскиот фудбал забележа значајни резултати. Репрезентацијата настапи на Олимписките игри во Сеул во 1988 година, а на Светското првенство во Италија во 1990 година го освои петтото место.

— реклама —

Со неговото заминување, македонскиот и скопскиот фудбал загубија голема фигура, која целиот свој живот го посвети на спортот и фудбалот.

Фудбалската федерација на Македонија упати сочувство до семејството, пријателите, фудбалските соработници и сите кои го познаваа и почитуваа Филиповски.

Погребот ќе се одржи утре на Градските гробишта Бутел во Скопје, во периодот од 11:30 до 12:30 часот, во капелата во Бутел.