Почнува откупот на тутунот, производителите стравуваат од ниски цени

На 16 ноември ќе започне откупот на годинешната реколта тутун, една недела пред законскиот рок, но производителите сè уште не знаат колкава цена ќе добијат за својот труд. Главната неизвесност е дали откупната цена ќе ги покрие значително зголемените трошоци за производство.

— реклама —

Од Сојузот на тутунарски здруженија очекуваат просечната цена да достигне од 440 до 450 денари за килограм, наспроти ланските 420 денари. Претседателот на Сојузот, Кире Ристевски, очекува целиот род да биде откупен како прва класа, како што било практика во изминатите неколку години. Според него, тоа го навестува и фактот што сè уште нема анекси на договорите за промена на цените по класи.

За откуп се пријавиле 10 компании, а предавањето на тутунот ќе се врши на 324 ваги. Производителите проценуваат дека реколтата тежи околу 26 милиони килограми, додека откупувачите очекуваат 28 милиони килограми. Причината за разликата од два милиони килограми засега не е разјаснета.

— реклама —

Министерот за земјоделство Борче Серафимовски по средбата со производителите во прилепскиот регион најави просечна откупна цена повисока од ланските 420 денари, но не откри колкаво ќе биде зголемувањето. Тој најави и субвенции од 80 денари за килограм тутун од прва класа, 70 денари за втора и 60 денари за трета класа, што отвори прашања кај производителите во однос на најавата дека целиот род би се откупувал како прва класа.

— реклама —

Според Серафимовски, со тутунопроизводство се занимаваат околу 18.000 земјоделски стопанства, а извозот на тутун и производи од тутун носи годишен девизен прилив од 140 до 150 милиони евра. Тој најави дека мерките за поддршка ќе се приспособуваат на пазарните движења.

Најавите за цена повисока од 420 денари ги оцени како недоволни и поранешниот координатор на новоформираните тутунски здруженија, Игор Мирчески, кој смета дека не соодветствуваат на квалитетот на тутунот и вложениот труд.

— реклама —

Незадоволни се и производителите, кои укажуваат на поскапувањето на производствените материјали. Тутунарот Панче Митрев посочи дека литар нафта лани чинел околу 70 денари, а годинава достигнал 100 денари. Дел од земјоделците сметаат дека откупната цена треба да изнесува најмалку 10 евра за килограм и предупредуваат дека не сакаат тутунопроизводството да ја доживее судбината на пиперките, јаболката, грозјето и житото, за кои претходно имаше реакции поради ниските откупни цени.