Легендарниот италијански дефанзивец и почесен претседател на Милан, Франко Барези, почина на 66-годишна возраст.
Барези целата своја играчка кариера, од 1977 до 1997 година, ја мина во дресот на Милан, каде што настапи на 719 натпревари, постигна 33 гола и 15 сезони беше капитен на „росонерите“. Со клубот освои шест титули во Серија А, три европски шампионски титули, четири Суперкупа на Италија, два европски Суперкупа и два Интерконтинентални купа. Неговиот легендарен дрес со број 6 беше повлечен од употреба по неговото пензионирање.
За репрезентацијата на Италија одигра 81 натпревар. Беше дел од генерацијата што ја освои светската титула во 1982 година, а како капитен ја предводеше „азурите“ и во финалето на Светското првенство во 1994 година.
Во 2025 година Барези беше опериран поради јазол на белите дробови, а последен пат се појави во јавноста на отворањето на Зимските олимписки игри во Милано и Кортина во февруари годинава.
По веста за неговата смрт, Милан објави емотивна порака, истакнувајќи дека неговиот пример, интегритет и љубов кон клубот засекогаш ќе останат дел од ДНК на „росонерите“. Почит му оддадоа и бројни поранешни соиграчи, ривали и клубови, меѓу кои Паоло Малдини, Џанлуиџи Буфон, Интер и италијанската премиерка Џорџа Мелони.
