Под мотото „Сите нека знаат“, денес во Скопје ќе се одржи седмото издание на Скопје прајд, настан посветен на промоција на еднаквоста, човековите права и видливоста на ЛГБТИК+ заедницата.
Собирот на учесниците е закажан за 18 часот кај фонтаната „Лотосов цвет“ во Градскиот парк, додека протестниот марш ќе започне во 19 часот. Поворката ќе се движи по булеварот „Илинден“, улицата „Франклин Рузвелт“, булеварот „Партизански одреди“, улицата „Димитрие Чуповски“ и ќе заврши во паркот „Жена борец“.
Организаторите истакнуваат дека Парадата на гордоста и годинава има протестен карактер и претставува повик за почитување на човековите права, достоинството и еднаквите можности за сите граѓани.
Скопје прајд го организира Национална мрежа против хомофобија и трансфобија, мрежа формирана во 2014 година, која обединува организации и активисти што работат на унапредување на правата на ЛГБТИК+ заедницата.
Во рамки на годинашните активности се одржува и фестивалот „Викенд на гордоста – Скопје“, кој преку изложби, културни настани и јавни дебати ги отвора прашањата за различностите, човековите права и општествената инклузија.
Со мотото „Сите нека знаат“, организаторите порачуваат дека видливоста, еднаквоста и безбедноста на сите граѓани треба да бидат темелни вредности на секое демократско општество.
