Американско-иранските преговори, кои денеска започнуваат во швајцарскиот Бургеншток и се очекува да траат неколку дена, почнуваат во атмосфера на нови тензии и меѓусебни обвинувања меѓу Техеран и Вашингтон.
Во пресрет на разговорите, чиј главен фокус ќе бидат спроведувањето на прекинот на огнот, иранската нуклеарна програма и безбедноста на пловидбата низ Ормускиот теснец, Иран и САД разменија остри пораки околу состојбата во регионот.
Иранската Револуционерна гарда предупреди дека бродовите би можеле да бидат изложени на ризик доколку се приближат до Ормускиот теснец, еден од најважните светски поморски коридори за транспорт на нафта и природен гас. Предупредувањето доаѓа по израелските напади во Либан и, како што тврди Техеран, непочитувањето на американските обврски од привремениот договор.
Советникот на иранскиот врховен лидер, Мохамад Мохбер, го обвини Вашингтон дека не ја спроведува првата точка од привремениот договор од 14 точки, која предвидува прекин на огнот на сите фронтови, вклучително и во Либан.
„Американците најдобро го разбираат јазикот на економијата и пресметката на добивките и загубите. Ако договорот остане само на хартија, ќе биде загрозен и енергетскиот проток од Блискиот Исток“, порача Мохбер преку социјалната мрежа Икс.
Од американска страна, тврдењата за затворање на Ормускиот теснец беа отфрлени. Американската Централна команда соопшти дека само во саботата низ теснецот поминале 55 трговски бродови кои транспортирале повеќе од 17 милиони барели нафта кон светските пазари.
Американскиот потпретседател Џеј Ди Венс изјави дека не видел докази оти Ормускиот теснец е затворен и изрази уверување дека прекинот на огнот ќе се одржи.
„Се надевам дека ќе постигнеме напредок околу нуклеарното прашање и прекинот на огнот во Либан“, изјави Венс пред заминувањето за Швајцарија.
Американскиот тим на разговорите го сочинуваат Венс, специјалниот пратеник за Блискиот Исток, Стив Виткоф и Џаред Кушнер, додека иранската делегација ја предводи претседателот на парламентот, Мохамад Багер Галибаф.
Преговорите се одвиваат и во услови на нестабилна безбедносна состојба во Либан. И покрај договорениот прекин на огнот, либанската цивилна заштита соопшти дека најмалку 20 лица загинале во израелски напади во саботата.
Израелските власти нагласуваат дека не се директна страна во американско-иранскиот договор и дека ќе продолжат да дејствуваат против секоја закана за својата безбедност. Израелската армија соопшти дека останува посветена на прекинот на огнот, но дека ќе продолжи со операции против потенцијални закани.
Разговорите во Швајцарија се сметаат за клучен чекор кон можен поширок договор меѓу САД и Иран, но останува неизвесно дали двете страни ќе успеат да ги надминат длабоките несогласувања околу безбедносните и регионалните прашања.
