Поддршка за Украина и модернизација на Армијата во фокусот на средбата Сиљановска-Давкова – Руте

Зајакнувањето на сојузничката соработка, модернизацијата на Армијата и поддршката за Украина биле меѓу темите на разговор на средбата меѓу претседателката Гордана Сиљановска-Давкова и генералниот секретар на НАТО, Марк Руте, во Брисел, во рамките на нејзината работна посета.

— реклама —

Сиљановска-Давкова ја потврди посветеноста на Македонија кон НАТО и колективната одбрана, нагласувајќи дека единството меѓу сојузниците и силната трансатлантска врска се клучни за заедничката безбедност.

Таа ја реафирмираше определбата за исполнување на целта за издвојување средства согласно Хашкиот план, посочувајќи дека државата континуирано вложува во модернизација на Армијата, сајбер-отпорноста, новите технологии и заштитата на критичната инфраструктура.

— реклама —

Осврнувајќи се на Коридорите 8 и 10, претседателката истакна дека тие имаат стратешко значење, бидејќи ја поврзуваат регионалната соработка со безбедносните интереси на НАТО и Европската Унија, особено во однос на воената мобилност.

— реклама —

Таа изрази задоволство и од сертификацијата на Лесната пешадиска баталјонска група како борбено подготвена, оценувајќи дека тоа ја потврдува професионалноста и способноста на Армијата да учествува во операции предводени од НАТО, ЕУ и ОН.

Според Сиљановска-Давкова, искуството од членството во НАТО и исполнувањето на високите сојузнички стандарди треба да послужат како пример за доследна примена на Копенхашките критериуми во процесот на европска интеграција.

— реклама —

На средбата била потврдена и поддршката за Украина, како и потребата од продолжување на политичката, воената, финансиската и хуманитарната помош. Претседателката нагласила дека сеопфатниот, праведен и траен мир мора да се темели врз меѓународното право и Повелбата на Обединетите нации, а почитувањето на овие принципи е неразделно од зачувувањето на меѓународниот поредок.