СИЉАНОВСКА-ДАВКОВА

Средба Сиљановска-Давкова – Берсе: Фокус на демократијата, реформите и вештачката интелигенција

Гордана Сиљановска-Давкова денеска оствари средба со генералниот секретар на Совет на Европа, Ален Берсе, кој престојува во официјална посета на Македонија.На средбата била истакната улогата на Советот на Европа како институција што повеќе од седум децении ги промовира демократијата, човековите права и владеењето на правото како темелни европски вредности.Сиљановска-Давкова оцени дека Новиот демократски пакт за Европа претставува важен чекор кон обновување на довербата во институциите и зајакнување на демократската отпорност во услови на политички, безбедносни и технолошки предизвици.Таа посочи дека развојот на дигиталните технологии и вештачката интелигенција отвора нови прашања поврзани со заштитата на човековите права, приватноста и демократијата, поздравувајќи го потпишувањето на Рамковната конвенција за вештачка интелигенција и човекови права.Претседателката оцени и дека одлуката за затворање на постмониторинг дијалогот со земјава претставува значајно признание за напредокот во реформите поврзани со владеењето на правото, независноста на судството и борбата против корупцијата.Во разговорот, Сиљановска-Давкова предупредила дека билатерализацијата на европскиот пристапен процес го поткопува концептот на проширување заснован врз Копенхашките критериуми.Таа се осврнала и на неспроведувањето на пресудите на Европски суд за човекови права од страна на одделни земји-членки, нагласувајќи дека прашањата за идентитетот, здружувањето и самоопределувањето се европски, а не билатерални прашања.Берсе, од своја страна, истакнал дека застојот во процесот на проширување создава фрустрации кај земјите кандидатки и предупредил дека тоа може да предизвика негативни политички тенденции, особено во регионот на Западен Балкан.Тој посочил и дека Советот на Европа работи на механизми за поефикасна имплементација на пресудите на Европскиот суд за човекови права.Двајцата соговорници изразиле подготвеност за продлабочување на соработката во пресрет на македонското претседавање со Комитетот на министрите на Советот на Европа во периодот 2027–2028 година.

Македонија | пред 2 часа

Сиљановска-Давкова: Не верувам во демографски фатализам, убедена сум дека државите можат да одговорат мудро, стратегиски и хумано

Гордана Сиљановска-Давкова се обрати на приемот организиран во чест на учесниците на регионалната конференција „Предводење на промените: Патеки кон демографска отпорност согласно потребите на луѓето“, посветена на демографските промени и нивното влијание врз иднината на општествата.Претседателката изрази задоволство што Македонија годинава е домаќин на конференцијата, на која учествуваат министри, владини претставници, експерти и претставници на меѓународни организации од повеќе од 30 држави.Според неа, демографијата одамна престанала да биде само статистичка дисциплина и прераснала во едно од клучните политички, економски и цивилизациски прашања што влијаат врз пазарот на трудот, пензиските и здравствените системи и стабилноста на државите.Сиљановска-Давкова посочи дека државата, како и голем дел од Европа, се соочува со троен демографски предизвик – ниска стапка на наталитет, висока емиграција и забрзано стареење на населението. Според најновите проекции, населението во земјава би можело да се намали за речиси 33 проценти до 2070 година.„Не верувам во демографски фатализам. Напротив, убедена сум дека државите можат да одговорат мудро, стратегиски и хумано“, истакна претседателката.Таа оцени дека демографската отпорност не може да се гради само со финансиска поддршка, туку и преку политики што ќе обезбедат сигурност, функционални институции, квалитетно образование, грижа за децата и предвидлива иднина за младите и семејствата.Претседателката ја поздрави Националната стратегија за развој 2024–2044, во која демографската ревитализација е поставена како национален приоритет, како и формирањето Министерство за социјална политика, демографија и млади.„Демографските промени ќе го дефинираат 21 век исто толку силно колку што индустриската револуција го дефинираше 19 век“, порача Сиљановска-Давкова.

Македонија | пред 2 часа

Сиљановска-Давкова на Самитот во Ереван: Енергетската и инфраструктурната поврзаност се клуч за стабилна и безбедна Европа

Претседателката Сиљановска-Давкова, во рамките на учеството на 8. самит на Европската политичка заедница, што се одржува во Ереван, Ерменија, денеска се обрати на тркалезната маса на тема „Зајакнување на поврзаноста и економската безбедност во контекст на зелената транзиција“.Таа оцени дека актуелните глобални конфликти и енергетски турбуленции создаваат сериозни ризици за енергетската стабилност, при што особено ранливи се малите држави.За Сиљановска-Давкова, енергетската поврзаност не е само економско прашање, туку и безбедносен, национален, регионален и европски приоритет.Таа смета дека најголемите пречки за енергетската поврзаност на Западниот Балкан немаат технички, туку политички карактер.Според неа, билатералните спорови и (зло)употребата на ветото предизвикуваат поголема штета на регионалната поврзаност отколку каков било недостиг од инфраструктура. „Секој замрзнат процес на интеграција значи замрзната инвестиција и иднина“, рече претседателката.Сиљановска-Давкова констатираше дека земјите од регионот поединечно имаат ограничени капацитети, но преку заедничко дејствување можат да станат вреден европски партнер. Заедничката инфраструктура создава заемни интереси и меѓузависност на државите, што пак влијае врз намалувањето на ризикот од конфликти и поголемата отпорност на трети страни.Наместо концентрирана енергетска зависност, за Сиљановска-Давкова потребна е диверзификација преку нови и алтернативни енергетски коридори и поврзување со различни извори, вклучително и од Западниот Балкан и Каспискиот регион.Во обраќањето, таа укажа дека зелената транзиција и енергетската безбедност се дел од ист стратешки проект и дека обновливите извори на енергија се клучни за поголема независност и стабилност.Со тркалезната маса претседаваа премиерите на Хрватска и Норвешка, Андреј Пленковиќ и Јонас Гар Шторе. Во дискусијата учествуваа заменик-претседателот на Турција, премиерите на Белгија, Канада, Грузија, Словачка, генералниот секретар на ОБСЕ, како и претседателката на Европската комисија.

Македонија | пред 3 дена

Средба на Сиљановска-Давкова со претседателот на Ерменија, Хачатурјан

Претседателката Гордана Сиљановска-Давкова денеска во Ереван оствари средба со претседателот на Република Ерменија, Вахан Хачатурјан, на којашто обајцата изразија подготвеност за продлабочување на пријателските односи и унапредување на соработката.Ерменскиот претседател се заблагодари за посетата и учеството на Сиљановска-Давкова на 8. Самит на Европската политичка заедница. Тој истакна дека е голема чест, иако не се земја-членка на Европската Унија, да бидат домаќини на овој настан.Во денешната прва билатерална средба двајцата претседатели препознаваат почеток на ново поглавје во меѓусебните односи и можности за конкретна соработка.Сиљановска-Давкова се заблагодари за гостопримството и организацијата на Самитот, оценувајќи дека Европската политичка заедница постепено се афирмира како значајна платформа за европско единство, дијалог и координација во соочувањето со заедничките предизвици.Претседателите се согласија дека визните олеснувања и директните авионски врски би придонеле за унапредување на економската соработка и трговската размена во иднина, коишто се на ниско ниво.Областите во коишто препознаваат можности за отпочнување на соработка се: информатичките технологии и дигиталните услуги, земјоделството, прехранбената и фармацевтската индустрија, туризмот, како и секторите базирани на иновации и знаење.Тие укажаа на потребата од склучување билатерални договори и поттикнување на директни контакти меѓу бизнис-заедниците, преку организирање бизнис-форуми.За Сиљановска-Давкова, за зближување на двата народа особено се важни: културната дипломатија, образовната и академската соработка, како и студентската размена преку програмата Еразмус плус, во којашто обете држави учествуваат.Таа ја истакна улогата на ерменската заедница во земјава, којашто е малубројна, но угледна и почитувана.Претседателката го поддржа продлабочувањето на соработката на Ерменија со Европската Унија, напорите за усогласување со европските политики и стандарди, како и посветеноста на реформите, особено на владеење на правото.Хачатурјан посака успех на македонскиот пат кон ЕУ.Двајцата претседатели упатија меѓусебни покани за официјални државни посети во иднина.

Македонија | пред 4 дена

Сиљановска-Давкова: Парламентарниот дијалог има незаменлива улога за мирот

Од Претседателскиот кабинет информираат дека претседателката Гордана Сиљановска-Давкова се обратила на XX Конференција на претседатели и спикери на парламенти на земјите учеснички во Јадранско-јонската иницијатива, што се одржува во македонското Собрание, во својство на претседавач на иницијативата за периодот 2025–2026 година.Во обраќањето, како што соопштуваат од Кабинетот, таа истакнала дека парламентарната дипломатија има клучна улога во зачувувањето на мирот и стабилноста во регионот, особено во услови на засилени глобални предизвици и неизвесност.Сиљановска-Давкова укажала на важноста од поголема улога на парламентите во меѓународните односи, нагласувајќи дека тие не смеат да бидат исклучиво во доменот на извршната власт.Таа, како што се наведува во соопштението, изразила загриженост поради нарушената рамнотежа меѓу трите власти и ослабените контролни механизми врз извршната власт, што претставува предизвик за парламентарната демократија.Претседателката посочила дека парламентите, како институции со директен легитимитет од граѓаните, се „политички школи на демократијата“ во кои се негува дијалогот меѓу власта и опозицијата.Во соопштението се наведува и дека Сиљановска-Давкова повикала на подлабоки реформи на Обединетите нации и Европската унија, оценувајќи дека е потребно нивно прилагодување на современите безбедносни предизвици.Таа се осврнала и на процесот на проширување на Европската унија, истакнувајќи дека е време за преиспитување на пристапот кон Западен Балкан и надминување на поделбите во Европа.„Време е за политичко вдомување на Западниот Балкан во европското семејство“, порача Сиљановска-Давкова, според соопштението.На конференцијата, како што информираат од Претседателскиот кабинет, учествувале претставници од повеќе земји од регионот и Европската унија, со заеднички заклучок за потреба од засилена регионална соработка.

Македонија | пред 2 седмици

Сиљановска-Давкова на 5. Дипломатски форум во Анталија: Потребна е превентивна, наместо реактивна дипломатија

Претседателката Гордана Сиљановска-Давкова учествуваше на петтото издание на Дипломатскиот форум во Анталија, каде се обрати на панел посветен на глобалните предизвици и управувањето со неизвесностите.Таа предупреди на растечки авторитарни тенденции, ремилитаризација и криза на политичкото лидерство, нагласувајќи потреба од поодговорни лидери и дипломатски пристап кој навремено ги препознава ризиците, наместо да реагира по нивното настанување.Претседателката истакна дека меѓународното право може да се применува ефикасно само со силни и стабилни меѓународни институции, при што ја нагласи потребата од реформи на Обединетите нации и Европската Унија.Во делот за Западен Балкан, Сиљановска-Давкова посочи дека евроинтеграциите претставуваат и безбедносно прашање, нагласувајќи дека отпорноста на надворешни влијанија е можна преку полноправно членство во Европската Унија.На панелот учествуваа и претставници од Казахстан и Грузија, а дискусијата опфати теми поврзани со геополитички тензии, економски и климатски ризици, како и технолошки и безбедносни предизвици.Учесниците се согласија дека зајакнувањето на мултилатералните институции и развојот на проактивна дипломатија се клучни за справување со современите глобални предизвици.

Македонија | пред 3 седмици

Сиљановска-Давкова: Климатските промени се глобален, регионален и национален безбедносен предизвик - време е за превенција наместо реакција!

Денеска, на иницијатива на претседателката Гордана Сиљановска-Давкова, во Кабинетот се одржа дебата на тема:„Климатски промени - ризици и предизвици“, модерирана од проф. д-р Владо Спиридонов, во својство на член на Советот за безбедност.Во воведното обраќање, претседателката предупреди дека климатските промени ги засилуваат постојните економски, социјални и безбедносни ризици.Според неа, време е за премин од реактивно кон превентивно дејствување, преку рано предупредување, координција, соработка меѓу институциите и интегрирани политики.За неа, енергетската транзиција и намалувањето на зависноста од фосилни горива се клучни, но тие мора да се спроведуваат на начин што нема да ја наруши стабилноста и одржливиот развој.Покрај претседателката, поздрави обраќања имаа и дoц. д-р Теодора Обрадовиќ-Грнчаровска – МЖСПП, национална координаторка за климатски промени и контакт лице со UNFCCC и проф. д-р Владо Спиридонов, модератор на тематската седница и член на Советот за безбедност.д-р Теодора Обрадовиќ-Грнчаровска во своето воведно обраќање насловено како „Институционален статус, тековни активности и Законот за климатска акција“, се осврна на националната легислатива, европското законодавство и реформите од Планот за раст, врзани за климатските промени.Проф. д-р Владо Спиридонов ги презентираше климатските сценарија 2026-2100 и алгоритмите за предвидување на природните непогоди.Дебатата се одвиваше во три сесии.Во првата сесија, насловена „Институционална рамка и законска регулатива за климатски промени, квалитет на воздух и здравствени последици“ говореа: проф. д-р Дејан Мираковски, ректор на Универзитетот „Гоце Делчев“, Анета Стефановска, раководителка на одделение за мониторинг на квалитет на воздух во МЖСПП, прим. д-р Оливер Зафировски, директор на Клиниката за пулмологија и алергологија, проф. д-р Маргарита Гиновска од ФЕИТ и д-р Наташа Марковска, научен советник во ИЦЕОР-МАНУ и контакт лице со IPCC.Втората сесија се фокусираше на климатските ризици, отпорноста и иновативните мерки за адаптација. Во нејзини рамки дебатираа панелистите: проф. д-р Ивица Милевски од Институтот за географија при ПМФ – Скопје, проф. д-р Никола Николов, декан на Факултетот за шумарски науки, пејзажна архитектура и екоинженеринг „Ханс Ем“, Ана Чоловиќ-Лешоска, извршен директор на Центарот за истражување и информирање за животната средина Еко-свест, Goldman Environmental Prize Winner 2019, м-р Васко Поповски, независен експерт со меѓународно искуство во намалување на ризици од катастрофи, климатска адаптација и отпорност и Борис Секирарски, дипл. инж. метеоролог и иноватор.На третата тематска сесија, под наслов „Интегрирано управување со води, квалитет на водите, георизици и адаптација на земјоделството“ дискутираа: проф. д-р Иван Блинков од Шумарски факултет, проф. д-р Ордан Чукалиев од Факултет за земјоделски науки и храна, проф. д-р Соња Липиткова од Универзитетот „Гоце Делчев“– Штип, Факултет за прирoдни и технички науки и проф. д-р Катерина Дрогершка од Институтот за сеизмологија.Во долгата, стручна и плодна дискусија, пропратена со бројни прашања и аргументирани одговори, беа предложени не само низа мерки за превентивно делување, туку и иновативни решенија за адаптација.Низ темелна опсервација, пропратена со релевантни податоци, компаративни анализи, докази, предвидувања, присутните добија јасна слика за: управувањето со квалитетот на воздухот, влијанието на аерозагадувањето врз здравјето, актуелните истражувања, иновациите и образованието во климатските системи, моделите за управување со климатските екстреми, спречувањето во борбата со пожарите, заштитата на водните ресурси и екосистеми, улогата на геологијата во служба на климатската адаптација, како и влијанието на климатските промени врз сеизмичките ризици.Конференцијата заврши со предлог заклучоци и препораки, коишто ќе бидат доставени до Советот за безбедност, релевантните институции и јавноста.

Македонија | пред 1 месец

Сиљановска-Давкова во официјална посета на Република Хрватска

Претседателката Гордана Сиљановска-Давкова, од денеска ќе престојува во официјална посета на Република Хрватска.Утре, 24 март 2026 година, вторник, во Загреб претседателката Сиљановска-Давкова ќе биде пречекана со највисоки државни и воени почести од претседателот на Република Хрватска, Зоран Милановиќ. Предвидено е претседателите да одржат тет-а-тет средба, по што ќе следува пленарен состанок на македонската и хрватската делегација.Сиљановска-Давкова ќе оствари средба и со претседателот на владата, Андреј Пленковиќ.Предвидено е претседателката Сиљановска-Давкова да положи венец на Споменикот на татковината, додека во Градскиот парк Бундек ќе положи венец на спомен-бистата на Блаже Конески.Сиљановска-Давкова ќе ја посети Македонската православна црква „Св. Злата Мегленска“ во Загреб и ќе оствари средба со преставници на македонската заедница во Хрватска. Во македонскиот Културно-информативен центар во Загреб претседателката ќе присуствува на отворањето на изложбата „Архивски документи“ на македонската уметница Жанета Вангели.Во рамки на официјалната посета, во среда, 25 март 2026 година, претседателката Сиљановска-Давкова ќе одржи предавање на Правниот факултет при Универзитетот во Загреб, на тема „За парадоксите на македонските евроинтеграции“.

Македонија | пред 1 месец

Сиљановска-Давкова: Ова не е време за реформи, за жал, бидејќи времето наликува на време за време на војна, или пред војна

Претседателката Гордана Сиљановска-Давкова на денешната заедничка седница на Националниот совет за евроинтеграции и Комисијата за европски прашања, на која беше разгледан последниот извештај на Европската комисија за напредокот на земјава, нагласи дека по 16. пат, овој извештај како и претходните не говори само за евалуираниот, туку говори и за евалуаторот. Таа посочи дека ЕУ немала јасна стратегија, доцнела на Балканот, САД понекогаш биле побрзи, не била доследна во мировното здружување, „па и денес преферира двојни стандарди.„Извештајот има многу добри податоци и критики, што добро треба да се анализираат и да се постапи по нив, но исто така понекогаш оценките на Европската Унија во овие 16 извештаи во вордингот секогаш се раководат од некоја клучна цел, што е она што за ЕУ е најважно во моментот и за тоа го врзуваат и моментумот. Така е и во овој извештај. По 16 пати, овој извештај како и претходните не говори само за евалуираниот, туку говори и за евалуаторот. Ако има оценка или натпревар за политичка спремност, тогаш ние ќе бидеме шампиони во спроведувањето, резултатите ги гледаме“,рече претседателката.Според неа, сега не е време за реформи.„Ова не е време за реформи, за жал, бидејќи времето наликува на време за време на војна, или пред војна, и тоа не е време кога можат да се прават реформи. Но за мене, и претходно и сега ЕУ е уникатна политичка филозофија, ја поддржуваат сите актери, јавноста на Балканот, ЕУ е перспектива, ЕУ е мотив за демократски реформи, Унијата стимулира реформи што водат до траен мир и стабилност. Сигурна сум дека нашата интегрираност во ЕУ ќе стави крај на феноменот балканизација како феномен на постојано менување на границите“,рече Сиљановска-Давкова..Таа истакна дека ЕУ понекогаш како да е опседната со важни моменти и датуми и сега слушаме дека ова е клучниот момент, повторно треба да се качиме на возот.

Македонија | пред 5 месеци

Сиљановска-Давкова: Патријархалната култура сè уште ја ограничува женската самодоверба

Претседателката Гордана Сиљановска-Давкова изјави дека одлуката на Уставниот суд, со која се овозможи самостојно кандидирање со два потписи, открила важен проблем во политичката култура – особено кај жените.„Прво, изненадувањето. Одеднаш се соочувате со можност сами да се кандидирате со два потписи. Ние сме одговорни суштества и секогаш размислуваме дали сме ние најдоброто решение, дали ќе можеме да одговориме на овој предизвик, особено ако не сме поддржани од луѓе кои ни веруваат. Тоа е првото“, рече Сиљановска-Давкова.Таа додаде дека проблемот е поврзан и со патријархалната и парохијалната политичка култура што сè уште е присутна во општеството. „Веројатно, се уште има силни елементи на, за жал, патријахална и парохијална политичка култура, па ние размислуваме на тој начин дека, можеби, не сме најдобрите“, изјави таа.Сиљановска-Давкова нагласи дека овој случај открил и внатрешен предизвик кај самите жени. „Овој инцидент со отсуството на член заради одлуката на Уставниот суд, што ќе го регулира кандидирањето, покажа и докажа дека и во нас, жените, има сериозен проблем. Не велам дека е тоа недоверба во себе, туку мислам дека е врзано со фактот дека сме поодговорни, бидејќи имаме потежок пат во животот, секогаш имаме дилеми,“ рече таа.„Најлесно одлучуваат оние кои не размислуваат или мислат дека по природа се надарени да бидат извонредни политичари, пратеници, советници, градоначалници и така натаму. Но, мислам дека оваа лекција треба добро да ја научиме за да ги смениме работите,“ додаде Сиљановска-Давкова.

Македонија | пред 6 месеци