Сиљановска-Давкова: Уставот не е само закон над законите, туку и општествен договор меѓу граѓаните и државата

Претседателката Гордана Сиљановска-Давкова оцени дека Уставот не е само највисок правен акт, туку и општествен договор меѓу граѓаните и државата. Ова го истакнала на средба со претставници на Македонското здружение на млади правници, организирана по повод 35-годишнината од донесувањето на Уставот.

Сиљановска-Давкова, која во 1991 година била надворешна членка на Уставната комисија, ги претставила процесот на подготовка и донесување на Уставот, јавната расправа и забелешките што произлегле од неа.

— реклама —

Таа начелно позитивно го оценила Уставот од 1991 година, повикувајќи се на споредбени уставни решенија и оценките на меѓународни институции и експерти. Истовремено, посочила дека дел од решенијата не го издржале тестот на времето.

— реклама —

Според претседателката, Македонија е меѓу државите со најмногу уставни измени, од кои голем број биле наметнати однадвор. Таа укажала и на двојното менување на преамбулата, како и на непрецизните одредби и неусогласената правна терминологија, поради кои Уставот е тежок за читање и подложен на различни толкувања.

Сиљановска-Давкова смета дека Уставната комисија треба постојано да го следи спроведувањето на Уставот, да ги утврдува слабостите на уставноправниот систем и да предлага соодветни решенија. Во нејзината работа, според неа, треба да бидат вклучени и надворешни уставноправни експерти, а потребно е да се уреди и односот меѓу македонското и европското право.

— реклама —

Претставниците на Македонското здружение на млади правници ја нагласиле важноста на уставниот патриотизам и едукацијата за Уставот како темел на правниот поредок, заштитата на човековите права и слободи и функционирањето на демократските институции.

Тие посочиле дека при уставните измени Собранието мора да ја почитува пропишаната постапка, да овозможи учество на експертите и да применува инклузивен пристап, имајќи предвид дека суверенитетот произлегува од граѓаните и ним им припаѓа.

Средбата е дел од серијата разговори што младите правници ги иницирале со личности кои учествувале во создавањето, толкувањето и проучувањето на Уставот.