„Домот е мала оаза на мир, емоционално прибежиште“, рече Сиљановска-Давкова на одбележувањето на 25 години СОС Детско село

Претседателката Гордана Сиљановска-Давкова, како покровителка, се обрати на одбележувањето на 25-годишнината од постоењето и работата на СОС Детско село во Македонија, што се одржа во Македонскиот народен театар во Скопје.

Во своето обраќање, Сиљановска-Давкова истакна дека возрасните имаат обврска да им обезбедат на децата љубов, внимание, сигурност, почит и поддршка, особено во моментите кога им е најтешко.

— реклама —

„Домот е мала оаза на мир, емоционално прибежиште, првата заедница во која ја учиме најважната животна лекција: дека неслучајно сме тука и дека секое дете има своја мисија во животот. За многу, многу деца и млади, токму ваков дом беше, е и ќе биде СОС Детско село“, порача претседателката.

Осврнувајќи се на 25-годишната работа на организацијата, таа ги истакна активностите насочени кон превенција, зајакнување на семејствата и заштита на децата, како и значењето на згрижувачите кои се најблиску до децата.

— реклама —

Според Сиљановска-Давкова, кога семејната средина не може да се зачува, алтернативната грижа претставува можност децата да добијат сигурност, поддршка и услови за продолжување на својот животен пат.

Таа посочи дека во изминатите 25 години СОС Детско село им помогнало на повеќе од 6.000 деца и млади, нагласувајќи дека секое од нив има своја приказна и потенцијал што треба да биде препознаен и поддржан.

— реклама —

„Секој млад човек понекогаш не е само ранливо суштество со многу желби и идеи, но не и можности да ги реализира, туку личност што треба да се заштити, да се почитува. Зошто? Заради неповторливиот потенцијал што го поседува секој од нас“, рече претседателката.

Сиљановска-Давкова потсети и на обврските на државата кон семејството, децата и малолетните лица, особено кон децата без родители и родителска грижа. Таа нагласи дека одговорноста за создавање услови за среќно детство не е само на семејствата, туку и на возрасните, институциите и целото општество.

Јубилејната програма беше проследена со видео-проекции, сценски и музички изведби, лични приказни и доделување признанија, преку кои беше претставена 25-годишната мисија на организацијата и придонесот на згрижувачите, младите, институциите, компаниите, здруженијата и партнерите.

„Дозволете ми, да ви го честитам јубилејот, да ви ги честитам 25-те години СОС Детско село, прекрасно село, убедена дека вложувањето во децата е вложување во нивната, ама и во нашата иднина“, порача Сиљановска-Давкова.