Сиљановска-Давкова ја прими претседателката на косовското Собрание, Албулена Хаџиу

Претседателката Гордана Сиљановска-Давкова ја прими претседателката на Собранието на Косово, Албулена Хаџиу, која е во официјална посета на Македонија.

— реклама —

На средбата беше истакнато задоволството од добрите односи меѓу двете земји, редовниот политички дијалог и усогласеноста за важни меѓународни прашања. Сиљановска-Давкова ја потврди поддршката за евроатлантските стремежи на Косово, нагласувајќи дека напредокот на државите кон членство во ЕУ треба да се оценува праведно, според копенхашките критериуми.

— реклама —

Таа ја истакна и важноста на парламентарната соработка, редовните средби и размената на добри практики за унапредување на демократијата и европската интеграција на регионот.

— реклама —

Хаџиу се заблагодари за пријателството и поддршката од Македонија, посебно за придонесот кон мирот и стабилноста на Косово преку КФОР и НАТО.

Двете соговорнички го поздравија напредокот во економската соработка и трговската размена, посочувајќи ја потребата од подобро инфраструктурно поврзување и поедноставување на царинските постапки. Разговараа и за актуелните политички состојби, при што оценија дека помирувањето и посилната регионална соработка се важни за европската иднина на Западниот Балкан.