Сиљановска-Давкова: Командата за операции е еден од столбовите на армискиот одбранбен систем

Командата за операции има клучна улога во одбраната на државата, а нејзината оперативна подготвеност зависи од знаењето, дисциплината, правилната проценка и способноста за навремено дејствување. Ова го истакна претседателката и врховна командантка на Вооружените сили, Гордана Сиљановска-Давкова, на одбележувањето на 17 октомври – Денот на Командата за операции, во касарната „Боро Менков“ во Куманово.

Осврнувајќи се на современите безбедносни предизвици, таа посочи дека конвенционалното и хибридното војување, сајбер-заканите, беспилотните системи и вештачката интелигенција наметнуваат потреба од постојано приспособување и унапредување на одбранбените капацитети.

— реклама —

Според Сиљановска-Давкова, подготвеноста на Армијата не се огледува само во способноста да одговори на криза, туку и во навременото препознавање на опасностите и ефикасното дејствување во неизвесни услови.

Таа нагласи дека членството во НАТО и усогласувањето со стандардите на Алијансата се потврда оти македонската Армија е кредибилен и доверлив сојузник, посочувајќи го нејзиното учество во заедничките активности и придонесот кон колективната безбедност. Притоа, изрази очекување јасните критериуми и доследното вреднување на постигнатото да се применуваат и во процесот на европската интеграција.

— реклама —

Претседателката ја истакна и подготвеноста на припадниците на Командата за операции за извршување на задачите согласно НАТО-стандардите, потврдена преку оценувањето на Лесната пешадиска баталјонска група во рамките на вежбата „БЛЕСОК 26“. Таа го посочи и придонесот на македонските војници во мировните мисии на Обединетите нации, Европската Унија и НАТО.

— реклама —

Посебно внимание посвети на нивниот ангажман при природни непогоди, пожари и други кризни состојби, кога професионалноста и солидарноста се ставаат во служба на заштитата на граѓаните.

Сиљановска-Давкова потсети дека на 18 август, по повод Денот на Армијата, ја одликувала Командата за операции со „Орден за воени заслуги“. Признанието, како што истакна, е потврда за придонесот во унапредувањето на армиските капацитети и зајакнувањето на борбената готовност.

На припадниците на Командата за операции им оддаде признание за професионалноста и посветеноста, повикувајќи ги да продолжат да ги надградуваат своите способности и да ја оправдуваат довербата на граѓаните.

„Со Вас се чувствуваме безбедни и сигурни“, порача претседателката, честитајќи им го 17 октомври – Денот на Командата за операции.