Претседателката на Европската комисија, Урсула фон дер Лајен, денеска пристигнува во Скопје, во рамки на нејзината турнеја низ земјите од Западен Балкан. Во главниот град ќе оствари средби со премиерот Христијан Мицкоски и претседателката Гордана Сиљановска-Давкова.
Фон дер Лајен и Мицкоски ќе имаат тет-а-тет средба во Владата, по што е предвидена заедничка прес-конференција.
Во пресрет на посетата, Мицкоски вчера порача дека Владата е подготвена за разговори и изнаоѓање решение, отфрлајќи ги обвинувањата од опозицијата дека се попречува евроинтегративниот процес поради неприфаќањето на уставните измени.
„Нашиот став е јасен, нашите аргументи се јасни. Ние сме подготвени да разговараме, да дебатираме и на крајот од денот да најдеме решение“, истакна Мицкоски.
Фон дер Лајен ќе се сретне и со претседателката Сиљановска-Давкова во Вила Водно. На средбата ќе се разговара за европската перспектива на земјата и регионот, како и за процесот на пристапување кон Европската Унија.
Меѓу темите се очекува да биде и спорот со Бугарија и можностите за негово надминување. Министерот за надворешни работи Тимчо Муцунски пред посетата изјави дека Македонија сака решение со Бугарија што ќе обезбеди предвидливост и сигурност во процесот на евроинтеграција.
Муцунски посочи дека постои желба од европските институции и од дел од земјите членки на ЕУ да помогнат во засилување на меѓусебниот ангажман и отворање простор за разговори, но нагласи дека позициите на Македонија се јасни и дека во овој момент нема услови за уставни измени поради начинот на кој Бугарија се позиционира.
Според него, и покрај билатералните контакти со Софија, досега не е постигнат напредок, поради што е потребна помош од Европската Унија. Муцунски позитивно ја оцени посетата на Фон дер Лајен и најави дека и ова прашање поконкретно ќе биде разгледано.
Посетата на Скопје е дел од турнејата на Фон дер Лајен низ Западен Балкан. Во рамки на турнејата таа веќе ги посети Албанија, Црна Гора и Косово, додека Србија и Босна и Херцеговина овојпат не се дел од нејзината агенда.
