Шефот на „Рајанер“: Фон дер Лајен е бескорисна

Извршниот директор на „Рајанер“, Мајкл О’Лири, остро ја критикуваше претседателката на Европската комисија, Урсула фон дер Лајен, и европските политичари поради даноците, прописите и недостигот од реформи за зголемување на конкурентноста на европската економија. Тој предупреди и дека авионските билети значително ќе поскапат во следните 12 месеци поради повисоките цени на горивото и дополнителните трошоци за емисиите.

О’Лири смета дека европските институции го оптоваруваат воздушниот сообраќај со нови давачки, иако го посочува како еден од ретките сектори во кои Европа успешно им конкурира на САД.

— реклама —

„Урсула фон дер Лајен зборува за конкурентност, а не презема апсолутно ништо. Дерегулацијата и либерализацијата овозможија раст на нискобуџетните компании како „Рајанер“. Денес можете да летате низ целиот континент за 50 евра“, изјави О’Лири.

Тој оцени дека САД се пред Европа во развојот на вештачката интелигенција и информатичката технологија, но дека авионскиот превоз во Европа е значително поевтин. Сепак, според него, европските институции со новите даноци и прописи ги зголемуваат трошоците за патниците.

— реклама —

О’Лири ја критикуваше и Фон дер Лајен поради неспроведувањето на препораките од извештајот за конкурентност на Европа, подготвен од поранешниот претседател на Европската централна банка, Марио Драги. Тој тврди дека, иако извештајот бил објавен пред две години, ниту една од неговите препораки не била спроведена.

Во меѓувреме, „Рајанер“ најави намалување на капацитетите во Белгија. Во текот на зимата компанијата ќе укине еден милион седишта и 20 линии, како и дел од летовите од аеродромите Завентем и Шарлроа. Како причина О’Лири го наведе зголемувањето на белгискиот данок за авионски патувања од две на седум евра по билет.

Тој рече дека компанијата ги пренасочува авионите кон земји со поповолни услови за работење, посочувајќи ги Словачка, Шведска, Италија и Унгарија како држави што ги укинале ваквите даноци. Според него, Белгија, Франција и Германија стануваат сè помалку конкурентни.

— реклама —

О’Лири упати критики и кон европскиот систем за тргување со емисии, тврдејќи дека тој неправедно ги оптоварува летовите во рамките на Европа, додека многу интерконтинентални летови се изземени од истиот режим. Тој смета дека еколошките давачки треба да важат за сите летови што слетуваат во Европа, без оглед на земјата од која доаѓаат.

Според него, европските институции со години не спроведуваат реформи во контролата на воздушниот сообраќај, иако, како што тврди, таа е одговорна за повеќе од 90 отсто од доцнењата на летовите. Тој посочи дека авиокомпаниите мораат да плаќаат обесштетувања и трошоци за грижа за патниците поради доцнењата, иако не можат да ги префрлат тие трошоци врз оние што ги предизвикуваат.

На крајот од разговорот, директорот на „Рајанер“ предупреди дека авионските билети значително ќе поскапат во следните 12 месеци. Како главни причини ги наведе поскапувањето на горивото и растот на трошоците за емисиите.

Тој изјави дека „Рајанер“ годинава ја обезбедил цената на горивото на околу 67 долари за барел, но дека следната година цената што ќе ја плаќа компанијата ќе биде двојно повисока. Дополнителен притисок врз цените, според него, ќе создаде и растот на трошоците за емисионите единици што авиокомпаниите мораат да ги плаќаат за летовите опфатени со европскиот систем.