Европската комисија се фокусира на деблокирање на пристапниот процес за Македонија, по што би можеле да следуваат и конкретни патокази за земјата, порача претседателката на Европската комисија, Урсула фон дер Лајен.
Одговарајќи на прашање за изоставувањето на Македонија од патоказите што Брисел ги подготвува за дел од земјите кандидати, фон дер Лајен потврди дека следната недела треба да биде направен првиот нов чекор во насока на деблокирање на процесот.
Таа рече дека целта е постојната ситуација да се деблокира и процесот повторно да се активира.
„Се договоривме да имаме еден прв нов чекор следната недела и да се обидеме да го деблокираме процесот и, всушност, да го претвориме во процес. Тоа е најважниот дел“, рече фон дер Лајен.
Според неа, следната недела ќе биде разгледан целиот пристапен процес. Таа објасни дека патоказите во моментов се однесуваат на државите кои веќе се длабоко навлезени во пристапните преговори и отвораат и затвораат поглавја.
Фон дер Лајен оцени дека, доколку се деблокира ситуацијата, процесот со Македонија може да се одвива брзо, бидејќи, како што рече, земјата веќе интензивно работи на неопходните реформи.
„Во моментот кога ќе ја деблокираме ситуацијата тука, моето лично мислење е дека можеме да бидеме мошне брзи со Македонија, затоа што веќе интензивно работиме на реформите кои се неопходни. Да, сè уште има работа, но импресивно е она што досега го имате направено“, порача таа.
Фон дер Лајен додаде дека во овој момент фокусот е ставен на деблокирањето на процесот, по што, според неа, може да се пристапи кон подготовка на патокази и за Македонија.
