Скопје во петок ќе биде една од станиците на турнејата на претседателката на Европската комисија, Урсула фон дер Лајен, низ Западен Балкан. Во рамките на посетата таа ќе разговара со претседателката Гордана Силјановска-Давкова и со премиерот Христијан Мицкоски.
На средбите се очекува да се разговара за европската перспектива на Македонија и регионот, како и за процесот на пристапување кон Европската Унија. Во фокусот би можел да биде и спорот со Бугарија и можностите за негово надминување.
Министерот за надворешни работи и надворешна трговија, Тимчо Муцунски, говорејќи пред посетата, порача дека Македонија е заинтересирана за решение со Бугарија што ќе обезбеди предвидливост и сигурност во евроинтегративниот процес.
Тој посочи дека кај европските институции и кај одредени земји членки постои интерес за интензивирање на дијалогот. Муцунски повтори дека ставот на македонската страна е јасен и дека во моментов нема услови за уставни измени, имајќи го предвид, како што наведе, позиционирањето на Бугарија.
Според него, досегашните директни контакти со Софија не донеле напредок, поради што е потребно поголемо вклучување на Европската Унија. Посетата на Фон дер Лајен, според Муцунски, може да биде можност овие прашања да бидат разгледани поконкретно.
Посетата на Скопје е дел од турнејата што Фон дер Лајен ќе ја започне на 30 септември во Албанија. Потоа таа ќе отпатува во Косово и Црна Гора.
Во оваа посета не се вклучени Србија и Босна и Херцеговина. Од Европската комисија појаснуваат дека причината е одржувањето избори во двете земји – предвремените парламентарни избори во Србија се закажани за 25 октомври, додека општите избори во Босна и Херцеговина ќе се одржат на 4 октомври.
