Сиљановска-Давкова се сретна со Димитрија Доксевски, директор на „Браќа Манаки“, и Марија Димитрова, претседателка на Друштвото на филмски работници

Во пресрет на 47. издание на Интернационалниот фестивал на филмска камера „Браќа Манаки“, претседателката Гордана Сиљановска-Давкова, која е покровителка на фестивалот, се сретна со директорот Димитрија Доксевски и претседателката на Друштвото на филмски работници, Марија Димитрова.

— реклама —

На средбата Доксевски, актер, сценарист и продуцент, и Димитрова, продуцентка, ја претставија годинешната фестивалска програма, која опфаќа повеќе од 80 филмови и над 20 едукативни содржини посветени на филмската камера и специфичниот визуелен јазик.

— реклама —

Годинешното издание ќе го збогатат значајни имиња од светската кинематографија. Меѓу нив е Дан Лаустсен, кому ќе му биде доделена „Златна камера 300“ за животно дело, како и Џеф Кроненвет, добитник на специјалната „Златна камера 300“ за особен придонес во филмската уметност.

— реклама —

На фестивалот повторно ќе гостува и полско-американскиот кинематографер и двократен добитник на „Оскар“, Јануш Камински, кој во 2020 година ја прими „Златна камера 300“.

— реклама —

Според Сиљановска-Давкова, долгогодишната традиција и високите уметнички стандарди го потврдуваат „Браќа Манаки“ како фестивал со меѓународно значење. Таа оцени дека Битола, особено кога фестивалот почнува и завршува со македонски филмови, станува место на светски кинематографски и културен дијалог и натпревар.