Сиљановска-Давкова им честиташе на српските граѓани за изборниот исход

Македонската претседателка Гордана Сиљановска-Давкова им честиташе на граѓаните на Србија за изборниот исход, оценувајќи дека покажале демократска зрелост преку мирен трансфер на политичката власт.

— реклама —

„Честитки за исходот од денешните избори во Србија. Српските граѓани покажаа демократска зрелост преку мирен трансфер на политичката власт“, напиша Сиљановска-Давкова на социјалната мрежа Икс, во објава на англиски јазик.

— реклама —

На предвремените парламентарни избори во Србија, според објавените проекции, најголема поддршка добила опозициската Студентска листа. Српскиот претседател Александар Вучиќ го признал поразот на својата политичка листа пред објавувањето на конечните официјални резултати.

— реклама —

Според проекциите, Студентската листа освоила меѓу 51 и 52 отсто од гласовите, што би ѝ донело од 138 до 140 пратенички места во парламентот со 250 места. Листата на Вучиќ, според истите процени, би добила од 103 до 105 мандати.

Изборите се одржаа по речиси две години студентски протести против корупцијата и власта во Србија, кои прераснаа во пошироко движење за политички и институционални промени.