Сиљановска-Давкова во Будимпешта: Вреди сите да се бориме за Европа како наш заеднички дом

Претседателката Гордана Сиљановска-Давкова присуствуваше на одбележувањето на 70-годишнината од Унгарската револуција од 1956 година во Будимпешта, каде што порача дека овој историски настан останува симбол на борбата за слобода, демократија и достоинство.

— реклама —

Во рамките на меѓународната програма, Сиљановска-Давкова присуствуваше на свечената седница на унгарското Национално собрание, на која се обратија високи унгарски и европски претставници, меѓу кои и претседателката на Европската комисија, Урсула фон дер Лајен, и претседателот на Европскиот совет, Антонио Кошта.

Во обраќањата било нагласено историското значење на револуцијата, како и потребата од зачувување на европското единство, демократијата и солидарноста во време на нови предизвици.

— реклама —

„Убаво е да се чујат највисоките претставници на ЕУ кога велат дека Унгарската револуција има голем придонес во изградбата на демократијата, дека вреди да се бориме сите за Европа, како наш заеднички дом“, изјави Сиљановска-Давкова.

— реклама —

Таа оцени дека револуцијата од 1956 година претставува траен симбол на храброста и слободољубивоста на унгарскиот народ, нагласувајќи дека одбележувањето има значење не само за Унгарија, туку и за цела Европа.

На свечената седница присутните со едноминутно молчење им оддадоа почит на жртвите на револуцијата, а беше прикажан и документарен филм посветен на историските настани.

Централниот комеморативен собир се одржа на плоштадот „Лајош Кошут“. Македонската претседателка присуствуваше и на гала-свеченост во Унгарската државна опера, како и на прием во Музејот на ликовните уметности, организиран од унгарскиот премиер Петер Маѓар.