Катерина Цаневска, независна советничка во Советот на Град Скопје предложена од СДСМ и координаторка на советниците од СДСМ, упати остри критики до претседателката Гордана Сиљановска-Давкова поради нејзината посета на Таранто, Италија.
Цаневска реагира во период кога, како што наведува, во повеќе делови од државата има пожари, а во Скопје е прогласена вонредна состојба во пет општини поради западнонилската треска.
„Пола држава се справува со пожари, граѓаните стравуваат, во пет општини во Скопје е прогласена вонредна состојба поради западнонилска треска, луѓе починаа. А каде е врховниот командант или командантка?“, прашува Цаневска.
Таа посочува дека претседателката во моментов е во Таранто, каде ги посетува македонските спортисти и Медитеранското село.
„Наместо состаноци со институциите, процена на состојбата и директна поддршка во кризата, гледаме фотографии на задоволната Сиљановска-Давкова со пораки за спортскиот дух и охрабрување ‘да се натпреваруваат витешки’“, вели Цаневска.
Според неа, спортот е важен, но државата не може да се води само со протоколарни посети и пораки на социјалните мрежи.
„Кога дома има пожари и загрозени животи, сосема легитимно е граѓаните да прашаат: Има ли пилот во авионот? Кој ја плаќа оваа посета?“, додава таа.
Во реакцијата Цаневска ја употребува и поговорката „Село гори, а баба се чешла“, оценувајќи дека таа, според неа, веќе не е само народна изрека, туку почнува да личи на модел на управување.
Таа додава дека граѓаните очекуваат државниот врв да биде присутен и во моменти на криза, а не само на протоколарни настани.
„Граѓаните би сакале да знаат дека државниот врв е и со нив – кога гори, кога комарците царуваат, кога боли и кога е најтешко“, порачува Цаневска.
Станува збор за политичка реакција на Цаневска и нејзина оценка за приоритетите на претседателката во услови на актуелните кризни состојби.
