Советничката Катерина Цаневска на седница на Советот на Град Скопје ја отвори темата за Универзална сала. Скопје е во зоната на научната фантастика, само тука може да немаме зграда, ама да бираме директор, рече таа.
„Најновата епизода од оваа комедија на апсурдот е вистината околу поништениот конкурс за директор на Универзална сала.
Во јавноста беа изнесени различни информации околу поништениот конкурс. Од една страна, тврдењето дека конкурсот бил поништен бидејќи имало само еден кандидат со нецелосна документација. Од друга страна, се појавија јавни реакции кои отвораат сомнежи околу ваквото образложение и ја доведуваат во прашање транспарентноста на целата постапка.
Оттука, моето советничко прашање гласи:
Кои конкретни надлежности и работни обврски треба да ги извршува директорот на Универзална сала во период кога објектот сè уште не е готов и не ја врши својата основна дејност, колку средства годишно се издвојуваат за функционирање на оваа институција во ваква состојба и дали Градот Скопје разгледал можност Универзална привремено да биде ставена во мирување до завршување на реконструкцијата, а постојните вработени времено да бидат распоредени во други установи согласно нивните квалификации и потребите на системот?
Дали ќе ги објавите сите документи поврзани со поништениот конкурс за директор, со цел целосно да се отстранат сомнежите“, праша Цаневска.
Таа посочи дека културата не се гради со конкурси, туку со институции што функционираат.
„Универзална сала не смее да биде симбол на административен апсурд во кој градот избира директор пред да ја заврши салата“, рече советничката.
