Актуелниот советнички состав во Град Скопје работи 7 месеци. И покрај седумте укажувања, се работи како пред дваесетина години, укажа советничката Катерина Цаневска.
„Недозволиво е во Советот да се гласа со кревање рака. Вака немаме увид и нема доказ кој и како гласал. Јасно ми е зошто вака се гласало во претходниот советнички состав, за да се сокрие како е гласано и кој ја кочеше работата на Градот. Дали и сега треба нешто да се сокрие”, праша советничката.
Таа потсети на новитетот на претходната седница за советнички прашања, кога по терк на општина Осијек, сите пратеници поставуваа прашања, а градоначалникот во монолог одговараше на сите. Опозицијата се спротивстави на ваквиот начин на работа бидејќи се убива дебатата и демократијата.
„Осијек и други општини не гласаат со кревање рака, ако го земате нивниот пример”, рече Цаневска.
Претседателот на Советот, Даме Димитриевски, се согласи со забелешката.
„Барем десет пати од службите барам да се реши овој проблем. И вчера разговарав и очекувам дека ќе се надмине ситуацијата”, рече Димитриевски.
