Поделени ставови во Чешка за еврото, индустријата бара промена, владата се противи

Чешката влада ја поддржа предложената уставна измена со која воведувањето на еврото би било условено со обезбедување мнозинство од три петтини во парламентот. Со оваа промена, националната валута, чешката круна, би добила уставна заштита, објави „Ројтерс“.

— реклама —

Сепак, предлогот сè уште нема обезбедено доволна поддршка за да биде усвоен, бидејќи владејачката коалиција нема потребно мнозинство за промена на Уставот. За негово изгласување ќе биде неопходна поддршка и од дел од опозицијата.

Чешка е меѓу шесте земји членки на Европската Унија што сè уште ја користат својата национална валута и нема утврдено датум за приклучување кон еврозоната. Владата на премиерот Андреј Бабиш, поддржана од десничарски партии, вети дека во текот на мандатот нема да покрене постапка за воведување на еврото.

— реклама —

Министерот за надворешни работи Петр Мацинка изјави дека приклучувањето кон еврозоната е одлука од големо значење, за која секоја влада треба да има силна поддршка.

— реклама —

Предлогот, сепак, наидува на противење од Чешката индустриска асоцијација, која се залага за воведување на заедничката европска валута. Од асоцијацијата посочуваат дека 65 отсто од чешкиот извоз е наменет за земјите од еврозоната.

Чешката народна банка засега има неутрален став кон предложената уставна измена.

Во меѓувреме, ставовите за еврото се менуваат и во други земји од Централна и Источна Европа. Унгарија, под водство на новиот премиер Петер Маѓар, го постави воведувањето на заедничката валута меѓу своите приоритети, за разлика од досегашната политика на земјата.