Русија и САД денеска треба да потпишат договор за продолжување на проектирањето на подводен тунел под Беринговиот Теснец, кој би ги поврзал двете земји, најави Кирил Дмитриев на маргините на Меѓународниот економски форум во Санкт Петербург.
Според него, станува збор за еден од најголемите потенцијални инфраструктурни проекти меѓу Москва и Вашингтон. Дмитриев посочи дека разговорите за таканаречениот „Тунел Путин-Трамп“ продолжуваат, а новиот договор треба да овозможи натамошен развој на проектот.
Тој откри дека неодамна разговарал со специјалниот пратеник на САД, Стив Виткоф, како и со Џаред Кушнер, при што фокусот бил ставен на економската соработка и можните заеднички инвестиции меѓу двете држави.
Предлог-проектот предвидува изградба на подводна железничка и товарна врска долга 112 километри, која би ја поврзала Русија со американската сојузна држава Алјаска. Вредноста на проектот се проценува на околу осум милијарди долари.
Според најавите, тунелот би можел да стане дел од поширока транспортна мрежа што би ги поврзала Северна Америка и Евроазија, со цел олеснување на транспортот и трговската размена меѓу континентите. Кремљ проценува дека изградбата би можела да биде завршена за помалку од осум години.
