Подводниот кабел од 1,9 милијарди евра повторно во игра: Грција чека дозволи за истражување

Грција направи чекор кон продолжување на долго одложуваниот проект за подводно енергетско поврзување во источниот дел на Средоземното Море, откако инвеститорот побара дозвола за нови истражувања на морското дно. Станува збор за проект поддржан од Европската Унија, кој треба да го поврзе Кипар со европското копно, а во подоцнежна фаза и со Израел.

Проектот „Грејт си интерконектор“ (GSI) го развива грчкиот оператор на преносниот систем IPTO, а неговата вредност се проценува на 1,9 милијарди евра. Неговото спроведување подолго време е забавено поради спорот меѓу Грција и Турција околу морското подрачје низ кое треба да поминува кабелот.

— реклама —

Портпаролот на грчката влада, Павлос Маринакис, соопшти дека француската компанија „Нексанс“, која е ангажирана за изведба на кабелот, во име на проектот побарала грчка дозвола за истражување на морското дно.

Атина очекува истражувањата наскоро да продолжат, со цел да се утврди точната траса на кабелот. Турција, пак, смета дека за таков потег е неопходна претходна координација меѓу двете држави. Анкара тврди дека планираната траса минува низ подрачје опфатено со нејзиниот поморски договор со Либија од 2019 година, кој Грција не го признава.

— реклама —

Маринакис појасни дека истражувањата ќе ги спроведе француски брод, но работите не можат да почнат сè додека барањето не го одобрат грчката крајбрежна стража и надлежниот министерски одбор, кој издава дозволи за истражувања во грчките морски зони.

— реклама —

„Кога станува збор за спроведувањето на проектот, Грција нема склучено никакви договори со властите на друга држава, освен со Франција и Кипар, што е и логично“, изјави Маринакис.

Поддршка за проектот минатата недела изрази и американскиот државен секретар Марко Рубио, кој во Атина порача дека Соединетите Американски Држави се силно посветени на неговата реализација. Тој нагласи дека енергетското поврзување ќе придонесе за разновидност на снабдувањето со енергија, што е особено важно во услови на војната во Украина и случувањата во Ормускиот Теснец.

Рубио најави и дека САД преку дипломатски канали ќе се обидат да ги отстранат можните пречки за спроведување на проектот.