Полицијата трага по група што преку социјалните мрежи се обидувала да го дестабилизира финансискиот систем на Србија

Српската полиција следи организирана група која со денови преку социјалните мрежи се обидувала да дискредитира јавни личности, државни институции и компании важни за функционирањето на економијата, со цел да предизвика дестабилизација на финансискиот систем на Србија, објави „Блиц“.

— реклама —

Според неофицијалните информации на весникот, активностите на групата внимателно се следат, а апсења на одговорните би можеле да се случат уште на почетокот на следната недела. Дел од нарачателите на овие активности наводно веќе ѝ се познати на полицијата, која добила поддршка и од Евроџаст, агенцијата на Европската Унија за соработка во кривичноправните прашања.

— реклама —

Како пример за нејзиното дејствување се наведува случајот по соопштението на Народната банка на Србија за одземањето на дозволата за работа на Алта банка. Според „Блиц“, групата го злоупотребила списокот на најголемите српски компании објавен на интернет-страницата на Агенцијата за стопански регистри и го споделувала на социјалните мрежи со лажно тврдење дека станува збор за депоненти на Алта банка.

Пораките со овие тврдења со часови се ширеле на социјалните мрежи, но биле испраќани и преку „Ватсап“ и „Вајбер“.

— реклама —

Според објавените информации, групата дејствувала преку новоотворени профили, создадени специјално за ширење чувствителни теми, кои потоа масовно ги коментирале со дезинформации. Наводно, нејзините членови се обидувале да навлезат и во студентски групи на социјалните мрежи, користејќи профили со ознака со бројот три и лажно претставувајќи се како студентски претставници.

„Блиц“ наведува дека сомнителните профили најчесто биле отворени пред пет-шест дена и имале само една или две објави, поврзани со наводни афери и откритија.