Политички спор во Полска поради наводна испорака на ракети „Патриот“ за Украина

Во Полска денеска изби политички спор поради сомневањата дека на Украина ѝ биле испорачани американски противвоздушни ракети „Патриот“, без за тоа да бидат информирани парламентот или претседателот на државата.

— реклама —

Опозициската партија Право и правда (ПиС) ја обвини владата дека донела таква одлука без потребната транспарентност, нагласувајќи дека овие ракети се неопходни за одбраната на полскиот воздушен простор.

Поранешниот министер за одбрана Мариуш Блашчак изјави дека ракетите „Патриот“ се клучен елемент во заштитата од балистички ракети и други современи закани.

— реклама —

Одговарајќи на обвинувањата, заменик-министерот за одбрана Цезари Томчик изјави дека информациите за воената помош за Украина се класифицирани и не можат јавно да се објавуваат.

— реклама —

Полемиката се засили откако украинскиот претседател Володимир Зеленски изјави дека Украина се соочува со недостиг од ракети „Патриот“, делумно поради зголемената побарувачка предизвикана од конфликтот со Иран.

Во април, украинскиот министер за одбрана Михајло Федоров им се заблагодари на Германија, Холандија, Шпанија и Полска за дополнителната воена помош. Полскиот министер за одбрана Владислав Косинијак-Камиш тогаш одби да открие дали Полска испратила ракети од сопствените резерви или ѝ отстапила предност на Украина при испораката на американските нарачки.

— реклама —

Советникот за надворешна политика на полскиот претседател, Марчин Пжидач, изјави дека според неговите информации, Полска ѝ го отстапила на Украина приоритетот при испораката на ракетите од САД.