Политико: Смртоносните напади во водите на НАТО ја загрозуваат поморската трговија

Безбедноста на пловидбата во Црното Море е сè повеќе загрозена од војната во Украина, откако во изминатата недела пет трговски бродови беа погодени во бугарски и романски води. Во нападите загинале најмалку четири лица, неколку морнари се водат како исчезнати, а има и повредени.

Поради зголемената опасност, Бугарија, Романија и Турција го покренале прашањето во НАТО, барајќи поголемо внимание кон регионот и заедничка поддршка, изјавиле двајца дипломати од Алијансата за „Политико“.

— реклама —

„Нападот во ексклузивната економска зона на Бугарија е апсолутно неприфатлив. Тој претставува сериозно кршење на поморското и меѓународното право и дополнително ќе ја загрози безбедната пловидба во Црното Море“, изјави бугарскиот премиер Румен Радев по нападите минатата недела.

Русија ги напаѓа украинските пристаништа и градови во регионот од почетокот на целосната инвазија врз Украина. Сепак, последните напади ја проширија опасноста и во водите на земји членки на НАТО. Доколку ваквите инциденти продолжат, лидерите на Европската Унија ќе се соочат со сè поголем притисок да ја заштитат пловидбата во Црното Море и да овозможат непречено одвивање на украинската трговија.

— реклама —

Темата се очекува да биде меѓу главните на самитот на Европскиот совет во четврток. Според нацрт-заклучоците до кои дошол „Политико“, лидерите треба да разговараат за „итно воспоставување безбеден премин за бродовите што превезуваат жито“.

— реклама —

Покрај Русија, и Украина користи поморски дронови во Црното Море, главно против бродови поврзани со Русија. Во јуни, украински поморски дрон експлодирал во романското пристаниште Констанца, откако Киев соопштил дека леталото ја променило насоката поради руско електронско попречување.

„Ситуацијата во Црното Море е прилично опасна бидејќи нападите доаѓаат од двете страни. Мора да се грижите и за двете страни“, изјавил претставник на Европската Унија од секторот за поморски транспорт, кој побарал да остане анонимен.

Дополнителен проблем е утврдувањето на одговорноста за нападите. Бугарскиот премиер Радев во средата изјавил дека истрагите сè уште не докажале дека Русија стои зад нападите. Неговата воздржаност, сепак, некои ја поврзуваат со неговиот генерално поблаг став кон Кремљ.

Операциите со дронови, и од руска и од украинска страна, веројатно ќе продолжат сè додека двете страни имаат финансиски средства и производствени капацитети за нивно одржување, изјавил Кристијан Влас, помошник-истражувачки менаџер за Источна Европа во истражувачкиот центар ACLED.