Поплавите во Европа денес предизвикуваат значително поголеми економски штети отколку пред една деценија, покажува анализата „Европа под вода“ на осигурителната компанија Allianz Trade.
Според анализата, во периодот од 2020 до 2025 година вкупната штета од поплави достигнала 88,6 милијарди евра, што е за речиси 20 проценти повеќе во споредба со претходната деценија. Во однос на првата деценија од овој век, штетите се зголемени за околу 40 проценти.
Истражувањето покажува дека повисоките загуби не се резултат на поголем број поплави. Напротив, Европа од 2000 година во просек бележи околу 50 поплави годишно. Сепак, нивните последици стануваат сè потешки, а како пример се наведува катастрофалната поплава во германската долина Ар во 2021 година.
Од Allianz Trade посочуваат дека една од главните причини за растот на штетите е тоа што и понатаму интензивно се градат станбени и деловни објекти во подрачја изложени на ризик од поплави. Поради тоа, денешните поплави уништуваат многу повеќе имот отколку пред дваесет години.
Во анализата се предупредува дека последиците од поплавите не се ограничуваат само на директната материјална штета, туку можат долгорочно да го забават економскиот раст преку намалување на инвестициите и приходите.
Главниот извршен директор на Allianz Trade за Германија, Мило Богаертс, оценува дека една голема поплава во Германија би можела во следните неколку години да го намали бруто-домашниот производ за околу 0,7 проценти.
Поради тоа, компанијата препорачува поголеми инвестиции во заштита од поплави, наведувајќи дека секое вложено евро во превенција може да спречи штета во вредност од околу четири евра.
