„Поради егзибициите и антидржавната политика на претходната влада, ние сега имаме политички услов, а тоа се уставните измени“, вели Мицкоски

Премиерот Христијан Мицкоски очекува Македонија следната година да добие уште попозитивна оценка од Европската комисија, посочувајќи дека дел од реформите спроведени по завршувањето на годинашниот извештаен период не биле опфатени во оценувањето.

— реклама —

Мицкоски рече дека евроамбасадорот Михалис Рокас потврдил оти земјата бележи значителен напредок во однос на минатата година. Според премиерот, извештајниот период завршил на 31 август, а потоа биле спроведени дополнителни реформи, особено во борбата против корупцијата и зајакнувањето на владеењето на правото.

— реклама —

„Очекувам следната година да имаме уште посилен извештај, со што ќе се потврдат напорите на оваа Влада и амбицијата да биде реформска влада“, изјави Мицкоски.

Во однос на уставните измени, премиерот порача дека позицијата на Владата останува непроменета. Тој ја обвини претходната влада на СДСМ и ДУИ дека прифатила политички услов кој, според него, сега го попречува напредокот на Македонија кон Европската Унија.

— реклама —

„Нашиот став како Влада е јасен и непроменет. За жал, поради егзибициите и антидржавната политика на претходната влада на СДСМ и ДУИ, ние сега имаме политички услов, а тоа се уставните измени“, рече Мицкоски.

— реклама —

Тој додаде дека дијалогот со Бугарија продолжува и изрази надеж дека ќе биде постигнато решение со кое Македонија, по 21 година кандидатски статус, конечно ќе може да го придвижи преговарачкиот процес со Европската Унија.