Повеќе од 1.800 здравствени работници водат судски спорови против државните болници и јавните здравствени установи во кои се вработени, барајќи исплата на над два милиони евра за неисплатени додатоци на плата.
Тужбите се однесуваат на прекувремена работа, ноќни смени, работа во недела, празници и работа во смени.
Директорот на Фондот за здравствено осигурување, Сашо Клековски, изјави дека бројот на спорови веројатно е уште поголем, бидејќи податоците се базираат на анкета на Фондот.
„Меѓу 10 и 20 проценти од вработените водат судски спорови. Најголемиот број, односно 70 проценти од тужбите, се во 10 институции, и тоа најчесто во општите болници“, рече Клековски.
Според него, Општата болница во Куманово има најмногу тужби – вкупно 317, додека Клиничката болница во Битола би имала најголем финансиски ефект од овие постапки.
Клековски ги повика директорите на здравствените установи да ги применуваат законските права и колективните договори таму каде што тоа е оправдано, но и да се обидат да постигнат договори со вработените за да се избегнат дополнителни судски и правни трошоци.
Воедно, тој апелираше и до здравствените работници да се откажат од дел од тужбите, особено во институциите со ниска ефикасност.
„Имаме парадокс – во истите институции имаме највисоко ниво на додатоци и најголем број тужби, што директно влијае врз одржливоста на установите“, изјави Клековски.
Тој најави дека Фондот, Министерството за здравство и синдикатите работат на отстранување на нејаснотиите во примената на законите и колективните договори, со цел да се спречат различни толкувања и нови судски спорови.
