Поранешниот главен советник за Русија во Белата куќа за време на мандатот на Џорџ В. Буш, Томас Греам, предупредува дека САД ризикуваат да ја пропуштат можноста да одиграат клучна улога во завршувањето на војната во Украина, бидејќи американскиот претседател Доналд Трамп во моментов е целосно насочен кон кризата со Иран.
Во авторски текст за „Њујорк тајмс“, Греам оценува дека и Москва и Киев нема бесконечно да чекаат повторно американско посредување, иако неодамна и рускиот претседател Владимир Путин и украинскиот претседател Володимир Зеленски изразија подготвеност Вашингтон повторно да се вклучи во мировните преговори.
Според него, војната влегува во опасна фаза на ескалација. Украина ги засилува нападите врз руска територија, особено врз воени и енергетски објекти, додека Русија ги интензивира нападите врз украинските градови и критичната инфраструктура, користејќи ја слабоста на украинската противвоздушна одбрана.
Греам предупредува дека растат материјалните разурнувања и бројот на цивилни жртви, а европските земји сè повеќе стравуваат од проширување на конфликтот.
„Со секој изминат ден од војната, иднината изгледа сè помрачна. Но, ако конфликтот заврши денес, секоја страна би можела да прогласи победа“, оценува тој.
Поранешниот советник смета дека САД имаат единствена можност да посредуваат меѓу Москва, Киев и европските сојузници, благодарение на своето политичко влијание и дипломатски врски.
Тој предлага Трамп што поскоро да ги испрати своите специјални претставници, Стив Виткоф и Џаред Кушнер, најпрво во Киев, а потоа и во Москва, со цел да започне интензивна „шатл-дипломатија“ што би можела да ги приближи позициите на двете страни.
Иако признава дека успехот не е загарантиран и дека нема да донесе брзи резултати, Греам предупредува дека Вашингтон мора да реагира веднаш, пред можноста за дипломатско решение целосно да биде засенета од натамошната ескалација на војната.
