Српските антирежимски медиуми добија нов сопственик: Го поврзуваат со Орбан и Вучиќ

Промената на сопственичката структура на дел од позначајните независни медиуми во Србија предизвика загриженост кај новинарските организации, откако португалската компанија Alpac Capital го презеде медиумскиот систем во кој се N1, Nova S, Nova.rs, Danas и Radar.

Независното здружение на новинари на Србија (НУНС) изрази „сериозна загриженост“ поради промените во управувањето со Adria News Network (ANN), особено затоа што дел од нив биле спроведени пред да заврши регулаторната постапка за преземањето.

— реклама —

Луксембуршката независна управа за аудиовизуелни медиуми (ALIA) денеска потврди дека трансакцијата сè уште не е одобрена и дека постапката за давање мислење за промената на контролата врз ANN е во тек.

Во меѓувреме, според податоците од српската Агенција за привредни регистри, вчера биле сменети дотогашните директори, односно законски застапници и дел од управите во United Media Digital, Adria News, Dan Graf и Adria News Nova S. На нивно место како застапник е назначен генералниот директор на Alpac Capital, Педро Варгас Давид.

— реклама —

Синдикатите во редакциите побарале итна средба со новиот директор, како и писмени гаранции дека нема да има мешање во уредувачката политика и загрозување на професионалните позиции на уредниците и новинарите.

НУНС оценува дека промените во управувачките структури пред завршувањето на регулаторната постапка оправдано отвораат прашање дали фактичката контрола врз медиумите се воспоставува пред надлежните институции да ја завршат проценката на трансакцијата.

— реклама —

Дополнителна загриженост меѓу вработените предизвикува и искуството со Euronews, кој Alpac Capital го презеде во 2022 година, по што следуваа планови за отпуштања и преструктурирање.

НУНС предупредува дека не станува збор само за работничките права, туку и за уредувачката независност на медиумите, како N1, Nova S, Danas и Radar, кои имаат значајна улога во критичкото новинарство во Србија и регионот.

— реклама —

Здружението потсетува и на Европскиот акт за слобода на медиумите (EMFA), според кој при медиумските концентрации, покрај пазарниот аспект, треба да се проценува и нивното влијание врз медиумскиот плурализам и уредувачката независност.

Дополнителни сомнежи предизвикуваат и претходни медиумски наводи во Србија за луѓето поврзани со португалската група, Педро Варгас Давид и извршниот партнер Луис Сантос. Според тие наводи, тие се доведуваат во врска со лица блиски до високи политички кругови во Унгарија и Србија, поврзани со унгарскиот премиер Виктор Орбан и српскиот претседател Александар Вучиќ.